వాటర్ ఆపిల్ – లాభాలు సాగు వివరాలు

మన దేశంలో పశ్చిమ బెంగాల్, ఒడిశా, మహారాష్ట్ర, తమిళనాడు, కర్నాటక రాష్ట్రాలలో వాటర్ఆపిల్ ను సాగు చేస్తున్నారు. అనంతపురం, కర్నూలు, నంద్యాల ఆదిలాబాద్, నల్గొండ, భద్రాది కొత్తగూడెం ప్రాంతాలలో వివిధ ఉద్యాన పండ్ల తోటలలో మిశ్రమ పంటగా సాగు చేస్తున్నారు కానీ వాణిజ్య పరంగా సాగు చేయడం లేదు.

వాటర్ ఆపిల్ ను శాస్త్రీయంగా సైజీజియమ్ ఆక్వీయా అని పిలుస్తారు. ఇది మిర్టేసి కుటుంబానికి చెందినది. ఇది ఇండోనేషియా, మలేషియా దేశాలలో పుట్టి ఉష్ణమండల దేశాలైన ఆఫ్రికా, దక్షిణాఫ్రికా దేశాలైన థాయ్లాండ్ ఇండియాలలో సాగు చేయబడుతుంది.

ఈ పండ్లలో పోషకాలు, విటమిన్లు, ఖనిజాలు, పీచు, పిండిపదార్థాలు మరియు ప్రొటీన్లు సమృద్ధిగా ఉండటమే గాక ఎక్కువ శాతం నీరు కలిగి ఉండడం వలన ఎండాకాలంలో డీ హైడ్రేషన్ కాకుండా చేస్తుంది.

• యాంటీ ఆక్సిడెంట్లు సమృద్ధిగా ఉంటాయి. ఇది శరీరాన్ని ఫ్రీరాడికల్స్ నుంచి రక్షణ కలిగిస్తుంది.
• ఫంగల్, బాక్టీరియా ఇన్ఫెక్షన్ల నుండి రక్షణ కలిగిస్తుంది.
• కొవ్వు శాతం చాలా తక్కువ కావున బరువు పెరగడం, ఊబకాయం నుండి నివారిస్తుంది.
• ఆక్సీకరణ, ఒత్తిడి, వాపును తగ్గిస్తుంది.
• పండ్లలో విటమిన్ సి, ఎ, బి పుష్కలంగా ఉంటాయి విటమిన్ ‘సి’ రోగనిరోధక వ్యవస్థను మరింత పటిష్టం చేస్తుంది.
• చర్మ సంబంధిత వ్యాధులు రాకుండా కాపాడుతుంది.
• పొటాషియం ఉండటం వలన గుండె ఆరోగ్యంను పెంపొందిస్తుంది.
• ఇది యాంటీ హైపెరైసీమిక్ లక్షణాలను కలిగి ఉంటాయి. కాబట్టి రక్తంలో చక్కెర స్థాయిలను తగ్గిస్తుంది. ఇందులో ఉండే జాంబోసిస్ పిండి పదార్థాలను చక్కెరగా మార్చడాన్ని నిరోధిస్తుంది.

నేలలు :-  రోజ్ ఆపిల్ సాగుకు ఒండ్రు నేలలు అనుకూలం. కానీ అన్ని రకాల నేలల్లో తక్కువ కర్బన శాతం కలిగిన ఇనుక నేలల్లో కూడా సాగు చేయవచ్చు. సున్నపు నేలలు, ఉదజని సూచి 8 కంటే ఎక్కువగా మురుగు నీరు పోని నేలలు అనుకూలం కాదు.

Also Read :-Water Apple Uses: వాటర్ యాపిల్ తినడం వలన వ్యాధులకు చెక్.!

వాతావరణం :- రోజ్ ఆపిల్ ఉష్ణమండల ప్రాంతాల్లో పెరుగుతుంది. అధిక వర్షపాతం మరియు ఎక్కువ తేమ కలిగిన ప్రాంతాల్లో సాగుకు అనుకూలం. వర్షపాతం 400 మి.మీ. నుండి 700 మి.మీ కలిగిన ప్రాంతాల్లో కూడా సాగు చేయవచ్చు.

ఉష్ణోగ్రత : – 18-38° సె. ఉష్ణోగ్రత సాగుకు అనుకూలం. తక్కువ ఉష్ణోగ్రత 5° సె. నుండి ఎక్కువ ఉష్ణోగ్రత 40° సె. వరకు కూడా తట్టుకోగలదు.

ప్రవర్ధనం :- విత్తనం ద్వారా ప్రవర్ధనం జరుగుతుంది. గాలి అంట్ల ద్వారా ప్రవర్ధనం చేసిన మొక్కలు త్వరగా నాటుకుంటుంది. వీటిని జూలై- ఆగష్టు మాసాల్లో నాటుకోవచ్చు.

రకాలు :-  అర్క నీలాచలం అక్షయ్ అను రకం ఎక్కువ దిగుబడి మరియు నాణ్యత గల పండ్లు ఇస్తుంది. అంతేకాకుండా నీటి ఎద్దడిని తట్టుకోగలదు. కావున పంటల వైవిధ్యీకరణలో దీనిని సాగుచేయవచ్చు దీని పండ్లు మార్చి- ఏప్రిల్లో వస్తాయి. ఇవి కాకుండా గులాబీ మరియు తెలుపు రంగులో వివిధ సర్టిఫైడ్ నర్సరీల నుండి మొక్కలను తీసుకోవచ్చు.

మొక్కలు నాటడం :- మొక్కలను 5-6 మీ. × 5-6 మీ. దూరంలో ప్రధాన పొలంలో నాటుకోవాలి. 60సెం.మీ. × 60సెం. మీ. × 60సెం. మీ. గుంతలను తీసి 10-15 కిలోల పశువుల ఎరువు, మట్టి మిశ్రమంలో కలిపి గుంతలను నింపాలి మరియు 2-5 కిలోల వేపపిండి వేయాలి. జూలై- ఆగష్టు మాసాలు నాటుటకు అనుకూలం.

నీటియాజమాన్యం :-  నీటి ఎద్దడిని తట్టుకుంటాయి. మొక్కలు పూతదశలో(నవంబర్-డిసెంబర్) ఉన్నప్పుడు క్రమం తప్పకుండా అవసరాన్ని బట్టి నీటిని ఇస్తుండాలి. మొక్కలు కాయ దశలో (ఫిబ్రవరి-మార్చి) నీటి ఎద్దడి లేకుండా చూసుకోవాలి మరియు 6-7 రోజుల వ్యవధిలో వాతావరణాన్ని బట్టి నీరు అందించడం ద్వారా నాణ్యమైన పండ్లను పొందవచ్చు.

ఎరువుల యాజమాన్యం :- కాతకు ముందు ప్రతి చెట్టుకు 20 కిలోల పశువుల ఎరువు వేయాలి. నాలుగవ సంవత్సరం తర్వాత 50 కిలోల పశువుల ఎరువు ప్రతి చెట్టుకు వేయాలి

4-5 సంవత్సరాల వయస్సు గల చెట్లుకు అందించాల్సిన ఎరువులు

పశువుల ఎరువు  50 కెజీ. / మొక్కకు / సంవత్సరం

నత్రజని             500 గ్రా. / మొక్క / సంవత్సరం

భాస్వరం            200 గ్రా. / మొక్క/ సంవత్సరం

పొటాషియం       200 గ్రా. / మొక్క / సంవత్సరం

ఎరువులను రెండు దఫాలుగా పూతకు ముందు మరియు కాయపట్టిన తర్వాత వేయాలి.

చీడపీడల యాజమాన్యం :- వివిధ రకాల పురుగులను, తెగుళ్ళును సమర్థవంతంగా తట్టుకుంటుంది. పేనుబంక వంటి రసం పీల్చే పురుగులను నివారించడానికి 5 మి.లీ. వేపనూనే లేదా ఎసిఫేట్ 1.50 గ్రా. ఒక లీటరు నీటికి కలిపి పిచికారి చేసుకోవాలి.

వివిధ శిలీంధ్రాల వలన ఆశించే సర్కొస్పెరా ఆకుమచ్చలు, గ్లియోస్పోరియం ఎసిపి, ఫిలోస్టిక్బా ఎస్పి, నల్లటి మచ్చలను ఆకులపై గమనించినట్లయితే కార్బండిజమ్ 2.0-2.5 గ్రా. లేదా మాంకోజెబ్ 3 గ్రా. ఒక లీటరు నీటికి కలపి పిచికారి చేయాలి.

కాయల కోత :-  అంట్ల మొక్కలు 3-4 సంవత్సరాల తర్వాత కాయ కోతలను చేయవచ్చు. పూత నుండి కాయలుగా ఏర్పడటానికి 3 నెలల సమయం పడుతుంది. పూత మరియు కాత అనేది వివిధ ప్రాంతాలపై ఆధారపడి ఉంటుంది.

వేడి, పొడి వాతావరణ పరిస్థితులు ఉన్న ప్రాంతాల్లో ఒక సంవత్సరంలో 2-3 సార్లు కాయలను కోయవచ్చు. కాయ రంగు ఆకుపచ్చ నుండి పసుపు రంగులకు మారడం, కాయ పూర్తి పరిమాణానికి వచ్చిన తర్వాత కాయలను కోయాలి.

దిగుబడి : ప్రతి మొక్కకు సరాసరిన 25-50 కిలోల కాయలను ఒక సంవత్సరంలో తీసుకోవచ్చు.

Also Read :-Water Apple: భలే భలే వాటర్ యాపిల్

కె. స్వాతి, పి. అరుణ్ కుమార్, ఎ. ఆదిశంకర్, వ్యవసాయ పాలిటెక్నిక్ మరియు వ్యవసాయ కళాశాల, పొలాస, జగిత్యాల, ఫోన్ : 8276871965