చరిత్ర నేర్పిన పాఠం.. కష్టకాలంలోనే ‘జాన్ డీర్’స్వర్ణయుగం..

పాతాళం నుంచి శిఖరానికి చేరిన ట్రాక్టర్ల ప్రస్థానం..!

వ్యాపార సామ్రాజ్యాలు ఎప్పుడూ పూలబాటపైనే సాగవు. ఆర్థిక మాంద్యం కోరలు చాచి, ఉనికినే ప్రశ్నించే తరుణంలో.. ధైర్యంతో అడుగులేస్తేనే చరిత్ర సృష్టించవచ్చని ‘జాన్ డీర్ (Deere & Company) నిరూపించింది. 1930ల నాటి ‘గ్రేట్ డిప్రెషన్’ సమయంలో, పతనం అంచున ఉన్న సంస్థ ఎలా పుంజుకుని, వ్యవసాయ రంగంలో విప్లవాత్మక మార్పులు తెచ్చిందో తెలిపే ఆసక్తికర కథనం ఇది.

అమ్మకాలు కూడా భారీగా క్షీణించాయి..

1930ల ప్రారంభం జాన్ డీర్ సంస్థకు అత్యంత గడ్డుకాలం. అప్పటి వరకు అమెరికా మార్కెట్‌లో 193 ట్రాక్టర్ తయారీ కంపెనీలు ఉండగా, ఆర్థిక మాంద్యం దెబ్బకు అవి కేవలం 38కి పడిపోయాయి. జాన్ డీర్ అమ్మకాలు కూడా భారీగా క్షీణించాయి. ఎంతలా అంటే, 1930లో కంపెనీ తన ట్రాక్టర్ ఫ్యాక్టరీని మూసివేయాల్సి వచ్చింది. స్టాక్ మార్కెట్‌లో ఒక్కో షేరు విలువ 300 డాలర్ల నుండి ఒక్కసారిగా 29 డాలర్లకు పడిపోయింది.

పోటీదారులు.. సవాళ్లు..

ఒకవైపు ఆర్థిక కష్టాలు, మరోవైపు ప్రధాన ప్రత్యర్థి ‘ఇంటర్నేషనల్ హార్వెస్టర్’ (IHC) నుంచి గట్టి పోటీ. ఆ సంస్థ ప్రవేశపెట్టిన ‘ఫార్మాల్ రెగ్యులర్’ ట్రాక్టర్ రైతుల్ని విశేషంగా ఆకర్షించింది. దానికి పోటీగా జాన్ డీర్ ‘మోడల్ జిపి’ని తెచ్చినప్పటికీ, సాంకేతికంగా అది వెనుకబడే ఉంది. ఇతర కంపెనీలైన జె.ఐ. కేస్, ఆలివర్ కూడా మెరుగైన ఫీచర్లతో మార్కెట్‌ను ఆక్రమించాయి.

సారథి మార్పు.. వ్యూహం రేర్పు..

ఈ క్లిష్ట పరిస్థితుల్లో సంస్థ వ్యవస్థాపకుడి మనవడు ‘చార్లెస్ విమాన్’ అధ్యక్ష బాధ్యతలు చేపట్టారు. వ్యవసాయ రంగంలో ట్రాక్టర్ల ప్రాధాన్యతను గుర్తించిన ఆయన, 1931లో ఒక ‘పవర్ ఫామింగ్ కమిటీ’ని ఏర్పాటు చేశారు. ఎల్మెర్ మెక్‌కార్మిక్, థియో బ్రౌన్ వంటి మేధావులతో కూడిన ఈ బృందం.. కేవలం పోటీని ఎదుర్కోవడం కాకుండా, మార్కెట్‌ను శాసించే సరికొత్త ట్రాక్టర్‌ను రూపొందించాలని సంకల్పించింది.

పురుడు పోసుకున్న అద్భుతాలు: మోడల్ ‘A’ అండ్  ‘B’..

అప్పటి వరకు ట్రాక్టర్లు అంటే పరిమిత మోడళ్లు మాత్రమే ఉండేవి. కానీ, ప్రతి రైతు అవసరానికి తగ్గట్టుగా వేర్వేరు సైజుల్లో ట్రాక్టర్లు ఉండాలని ఈ బృందం భావించింది. మోడల్ GX (ప్రోటోటైప్)..1932లో రూపొందించిన ఈ నమూనా జాన్ డీర్ భవిష్యత్తును మార్చేసింది. మోడల్ A (1934).. ‘జనరల్ పర్పస్ వైడ్ ట్రెడ్’ పేరుతో వచ్చిన ఈ ట్రాక్టర్ అఖండ విజయాన్ని అందుకుంది. ఇది ఆధునిక వ్యవసాయానికి పునాది వేసింది.

మోడల్ B..చిన్న కమతాలు ఉన్న రైతుల కోసం 14.25 హెచ్‌పి సామర్థ్యంతో ‘మోడల్ బి’ని రూపొందించారు. ఇది మోడల్ ‘ఎ’ కంటే చిన్నదైనప్పటికీ, అన్ని ఫీచర్లను కలిగి ఉండి సామాన్య రైతులకు వరంగా మారింది.

చరిత్ర నేర్పిన పాఠం..

తమ 90 ఏళ్ల చరిత్రలో ఎన్నడూ లేని సంక్షోభాన్ని ఎదుర్కొంటూనే, జాన్ డీర్ అత్యుత్తమ ఇంజనీరింగ్ నైపుణ్యాన్ని ప్రదర్శించింది. నేడు ప్రపంచవ్యాప్తంగా సాగు భూముల్లో మనం చూస్తున్న గ్రీన్ అండ్ ఎల్లో రంగుల ట్రాక్టర్ల సామ్రాజ్యం ఆ కష్టకాలంలో పడిన పునాదుల వల్లే సాధ్యమైంది.

పసుపులేటి శ్రీలక్ష్మి, జర్నలిస్ట్