ఎల్‌నినో ప్రభావంపై రైతులు, జిల్లా కలెక్టర్ల సదస్సులో – మంత్రి తుమ్మల నాగేశ్వరరావు

         ఎల్‌నినో ప్రభావంతో రాష్ట్రంలో నెలకొన్న వర్షాభావ పరిస్థితుల నేపథ్యంలో రైతులను అప్రమత్తం చేయడంతో పాటు, ప్రస్తుత పంటలను కాపాడేందుకు, రానున్న యాసంగి సీజన్‌లో నష్టాలను నివారించేందుకు అధికారులు సమన్వయంతో పనిచేయాలని రాష్ట్ర వ్యవసాయ, మార్కెటింగ్, సహకార, చేనేత, జౌళి శాఖల మంత్రి శ్రీ తుమ్మల నాగేశ్వరరావు ఆదేశించారు. ఈ రోజు జరిగిన రైతునేస్తం కార్యక్రమంలో భాగంగా జిల్లా కలెక్టర్లు మరియు రైతులతో నిర్వహించిన సదస్సులో డిప్యూటి సీఎం భట్టి విక్రమార్క మరియు మంత్రి తుమ్మల పాల్గొని ఎల్‌నినో ప్రభావం, వర్షాభావ పరిస్థితులు, యాసంగి పంటల ప్రణాళికపై దిశానిర్దేశం చేశారు.

         ఎల్‌నినో ప్రభావం ప్రపంచవ్యాప్తంగా ఉందని, దీని ప్రభావంతో వర్షపాతం తగ్గడం, నీటి నిల్వలు పడిపోవడం వంటి పరిస్థితులు ఏర్పడుతున్నాయని మంత్రి తెలిపారు. వాతావరణ పరిస్థితులను ముందుగానే అంచనా వేసి ప్రభుత్వం ఏప్రిల్ నుంచే ముందస్తు చర్యలు ప్రారంభించిందని పేర్కొన్నారు. అయినప్పటికీ కొన్ని ప్రాంతాల్లో రైతులు ఇబ్బందులు ఎదుర్కొంటున్నారని, ఈ పరిస్థితుల్లో రైతులకు వాస్తవ పరిస్థితులను వివరించి, అందుబాటులో ఉన్న నీటి వనరులు, పంటల పరిస్థితుల ఆధారంగా సరైన నిర్ణయాలు తీసుకునేలా అధికారులు మార్గనిర్దేశం చేయాలని సూచించారు.

       ప్రస్తుత వర్షాభావ పరిస్థితులను దృష్టిలో ఉంచుకొని యాసంగిలో వరి సాగు విషయంలో రైతులు అప్రమత్తంగా ఉండాలని మంత్రి కోరారు. ముఖ్యంగా నీటి లభ్యత తక్కువగా ఉన్న ప్రాంతాల్లో వరి సాగు చేయకుండా, తక్కువ నీటితో పండే ఆరుతడి పంటలు, స్వల్పకాలిక పంటల సాగుకు ప్రాధాన్యత ఇవ్వాలని సూచించారు. శనగ, పెసర, మినుము, వేరుశనగ, పొద్దుతిరుగుడు, కుసుమ వంటి పంటలను ప్రోత్సహించాలని తెలిపారు. ప్రాంతీయ పరిస్థితులు, నేల స్వభావం, నీటి లభ్యతను పరిశీలించి వ్యవసాయ శాస్త్రవేత్తల సూచనల మేరకు పంటలను ఎంపిక చేసుకోవాలని రైతులకు విజ్ఞప్తి చేశారు.

        రైతులు ప్రత్యామ్నాయ పంటల వైపు మళ్లేందుకు ప్రభుత్వం అవసరమైన చర్యలు తీసుకుంటోందని మంత్రి తెలిపారు. పప్పుధాన్యాలు, నూనెగింజల విత్తనాలను సబ్సిడీపై అందిస్తున్నామని పేర్కొన్నారు. ప్రత్యామ్నాయ పంటలు సాగు చేయాలని సూచించడంతోపాటు, వాటికి మార్కెటింగ్ సదుపాయాలు, కొనుగోలు అవకాశాలు ఉండేలా వ్యవసాయ, మార్కెటింగ్ శాఖలు సమన్వయంతో పనిచేయాలని అధికారులకు సూచించారు.

రాష్ట్రంలోని అన్ని జిల్లాల్లో ఒకే విధమైన పరిస్థితులు లేవని, జిల్లా, మండల, గ్రామ స్థాయిలో నీటి లభ్యతను బట్టి పంటల ప్రణాళిక రూపొందించాలని మంత్రి స్పష్టం చేశారు. ఐఎండీ అధికారులు, ఇరిగేషన్ శాఖ అధికారులు, భూగర్భజల శాఖ అధికారులు, విద్యుత్ శాఖ అధికారులు క్షేత్రస్థాయిలో అందుబాటులో ఉన్న వాస్తవ సమాచారాన్ని రైతులకు వివరించాలని ఆదేశించారు. చెరువులు, ప్రాజెక్టుల్లో నీటి నిల్వలు, భూగర్భజలాల పరిస్థితి, విద్యుత్ సరఫరా, రానున్న వర్షాల అంచనాలను పరిగణనలోకి తీసుకొని రైతులకు స్పష్టమైన సూచనలు ఇవ్వాలన్నారు.

“రైతులకు అర్థమయ్యే భాషలో, వాస్తవ పరిస్థితులను వివరించి చెబితే వారు తప్పకుండా అర్థం చేసుకుంటారు. క్షేత్రస్థాయి పరిస్థితులను దాచకుండా తెలియజేయాలి. రైతులు నష్టపోకుండా సరైన పంటల ఎంపిక చేసుకునేలా అధికారులు బాధ్యతగా వ్యవహరించాలి” అని మంత్రి సూచించారు.

వర్షాభావ పరిస్థితుల్లో ఇప్పటికే సాగులో ఉన్న పంటలను కాపాడటమే ప్రాధాన్యమని మంత్రి తెలిపారు. అవసరమైన చోట పంటలకు రక్షక తడులు అందించడం, నీటిని పొదుపుగా వినియోగించడం, వ్యవసాయ శాస్త్రవేత్తల సూచనల మేరకు పంటల సంరక్షణ చర్యలు చేపట్టడంపై రైతులకు అవగాహన కల్పించాలన్నారు. అధికారులు కార్యాలయాలకే పరిమితం కాకుండా గ్రామాలను సందర్శించి రైతులతో నేరుగా మాట్లాడాలని, రైతువేదికలను వ్యవసాయ సలహాలు అందించే కేంద్రాలుగా వినియోగించుకోవాలని సూచించారు.

ప్రస్తుత వర్షాభావ పరిస్థితులు రైతులకు ఇబ్బందులు కలిగిస్తున్న నేపథ్యంలో, ఈ పరిస్థితులను కూడా ప్రతిపక్షాలు తమ రాజకీయ స్వలాభం కోసం ఉపయోగించుకుంటున్నాయని మంత్రి విమర్శించారు. రైతులకు అండగా నిలవాల్సిన సమయంలో వాస్తవ పరిస్థితులను అర్థం చేసుకొని సహకరించాలని, రైతుల్లో అనవసర ఆందోళన కలిగించకుండా బాధ్యతాయుతంగా వ్యవహరించాలని పేర్కొన్నారు.

రైతులకు సరైన సమయంలో సరైన సలహాలు అందించడం, అందుబాటులో ఉన్న నీటి వనరులను సమర్థంగా వినియోగించడం, తక్కువ నీటితో పండే పంటలను ప్రోత్సహించడం ద్వారా వర్షాభావ ప్రభావాన్ని తగ్గించేందుకు ప్రభుత్వం కృషి చేస్తుందని మంత్రి తుమ్మల నాగేశ్వరరావు స్పష్టం చేశారు.

ఈ కార్యక్రమంలో సీఎస్ సంజయ్ జాజు, వ్యవసాయశాఖ కార్యదర్శి సురేంద్ర మోహన్, వివిధ శాఖల కార్యదర్శులు, డైరెక్టర్లు, వ్యవసాయ, ఉద్యాన శాఖ వైస్ ఛాన్స్ లర్లు, శాస్త్రవేత్తలు, జిల్లా కలెక్టర్లు మరియు రాష్ట్రవ్యాప్తంగా ఉన్న 1600 రైతు వేదికల నుండి వేలాది మంది రైతులు పాల్గొన్నారు.

Leave Your Comments