Value Addition Palmyrah: తాటి పండు ఆవశ్యకత మరియు విలువ ఆధారిత ఆహార పదార్దాలు.!

Value Addition Palmyrah: గ్రామీణ భారతంలో తాటి చెట్టు అత్యంత ప్రాధాన్యత గలది. తాటి చెట్టు భాగాలలో పనికి రానిది ఏదీ లేదు. మన దేశంలో తీరప్రాంత రాష్ట్రాలైన గుజరాత్‌, మహారాష్ట్ర, కర్ణాటక, కేరళ, గోవా, ఆంధ్రప్రదేశ్‌, ఒరిస్సా మరియు బెంగాల్‌లో తాటి చెట్లు అధికంగా ఉన్నాయి. ఇవి భారతదేశంలో సుమారు 15 కోట్లు ఉన్నట్లు అంచనా. అందులో అధికంగా తమిళనాడులో ఆ తరువాత ఆంధ్ర ప్రదేశ్‌లో ఉన్నాయి. ఆంధ్ర ప్రదేశ్‌లో సుమారు 3 కోట్లు తాటి చెట్లు ఉన్నాయని అంచనా. చక్కెర నిచ్చు చెట్లలో తాటి, ఖర్జురా, కొబ్బరి మరియు జీరిక ముఖ్యమైనవి. వీటిలో తాటిలో ఎక్కువ చక్కెర ఉంటుంది. ఈ చెట్లు సహజ సిద్దముగా పెరిగి విరివిగా లభించును. అందువల్ల చాలా ప్రాముఖ్యత కలదు.

తాటిలోని అన్ని భాగాలు ఉపయోగకరమైనవి. దాదాపు 800 పైగా ఉపయోగాలు ఉన్నాయని అంచనా. ఇందులో ముఖ్యమైనవి… నీరా, ముంజెలు, పండ్లు, తేగలు మరియు బుర్రముంజె తినేవాటిలో ముఖ్యమైనవి. వీటితోపాటు వివిధ భాగాలనుండి అనేక రకాలైన పీచు లభించును. వీటిలో ఆడచెట్ల నుండి మాత్రమే లభించు పండ్లు ఆగష్టు నుండి అక్టోబరు వరకు చాలా విరివిగా లభించును.

తాటి పండ్లు బాగా పక్వానికి వచ్చిన తరువాత వటికవే రాలుతాయి. సరాసరి ఒకచెట్టు నుండి 250 పండ్లు లభించును. తాటి పండులో 1 నుండి 3 టెంకలు ఉంటాయి. 74 % పండ్లలో మూడు టెంకలు ఉంటాయి. రెండు టెంకలు గల పండ్లు 18% ఉంటాయి. మిగిలిన 8% ఒక టెంకను కలిగి ఉంటాయి. తాటి పండులో గుజ్జు 11 శాతం, పీచు 13.5 శాతం మరియు టెంకలు 67.5 శాతంతో పాటు పైతొక్క 8 శాతముంటుంది. ఒక్కొక్క పండులో సుమారు 300 గ్రా. గుజ్జు లభించును. తద్వారా ఒక చెట్టు నుండి 75 కిలో గుజ్జు లభించును. ఆంద్రప్రదేశ్‌లో గల 1.5 కోట్ల ఆడ చెట్ల నుండి ఒక కోటి మెట్రిక్‌ టన్నుల గుజ్జు లభ్యత కలదు. ప్రస్తుతం ఒక శాతం గుజ్జు కూడా వినియోగంలో లేదు, చాలా తక్కువ పరిమాణంలో ఇళ్ళలో తాటి ఇడ్లి, రొట్టె చేసుకొంటారు. ఈ గుజ్జును ఉపయోగించి పరిశ్రమ పెట్టుటకు చాలా అవకాశలు కలవు.

Also Read: Agri Export-Import in India 2022: ఒడుదొడుకులు లేని అంతర్జాతీయ విపణి

Value Addition Palmyrah

తాటి గుజ్జు లోని పోషక విలువలు :
తాటి గుజ్జు దాదాపు 78 % తేమ మరియు 15 % చక్కెరలు కలిగి ఉంటుంది. మాంసకృత్తులు 3 %, పీచు పదార్దము 1.7 % తో పాటు ఖనిజ లవణాలు 4.4 % మరియు 100 గ్రా.లలో 3.2 మి.గ్రా. బీటా కెరోటిన్‌ను కలిగి ఉండును. వీటితో పాటు ‘‘సి’’ విటమిన్‌ మరియు అనేక పోషక విలువలు సమృద్ధిగా ఉండును. మామిడి పండ్ల కంటే అధికంగా పోషక విలువలు కలిగి ఉంటుంది.

సాధారణంగా తాటి గుజ్జు లభించే సమయంలో సేకరించి చాపల మీద సన్నని పొరలగ వేసి ఎండలో ఆరబెట్టి తాండ్ర తయారు చేస్తారు మరియు ఈ తాటి పండ్ల గుజ్జును నేరుగా గాని, విరి పిండి గోధుమ పిండిలో కలిపి వివిధ రకాల ఆహార పదార్ధ్దాలు తయారు చేయవచ్చు.

తాటి పండును వేడి నీటిలో పది నిమిషాలు ఉంచడం ద్వారా సులభంగా గుజ్జును వేరు చేయవచ్చు మరియు సహజంగా తాటిలో గల కొంచెం చేదును తొలగించవచ్చును, చేదును ఆవిరిలో ఉడికించండం ద్వారా కుడా చేదును పుర్తిగా తొలగించవచ్చును.

తాటి గుజ్జు నుండి ఆహార పదార్దాలు :

శీతల పానీయం :
తాటి గుజ్జుకు తగినంత పరిమాణంలో చక్కెర కలిపి 0.5% నిమ్మ ఉప్పును 0.1% సోడియం బెంజోయేట్‌ మరియు కావలసిన రంగును కలిపి తాజా పానీయమును చేసుకోవచ్చు. దీన్ని తగిన విధంగా నిల్వ ఉంచినచో రెండు నెలల వరకు నిల్వ ఉంచవచ్చు. తాటి గుజ్జును ఇతర పండ్ల గుజ్జుతో కలిపి వివిధ రకాలైన పానీయాలు తయారు చేయవచ్చు. ఇందులో పైనాపిల్‌, ద్రాక్ష, బత్తాయి వాడవచ్చు. తాటి గుజ్జులో మూడో వంతు ఇతర పండ్ల గుజ్జును తీసుకోవాలి.

స్క్వాష్‌ :
తాటి గుజ్జుకు చిక్కబడిన చక్కెర ద్రావణాన్ని కలపడం ద్వారా స్క్వాష్‌ తయారు చేయవచ్చు. సుమారు 200 గ్రా. గుజ్జుకు 300 గ్రా. చక్కెర మరియు చిటికెడు నిమ్మ ఉప్పు మరియు సోడియం బెంజోయేట్‌ ఒక లీటరు నీరు అవసరం. దీన్ని పరిశుభ్రమైన సీసాల్లో కొంచెం ఖాళీ ఉంచి నింపడం ద్వారా నిల్వ ఉంచవచ్చును.

జాము :
ఒక కె. జి. తాటి గుజ్జును అరగంట సేపు వేడిచేసి అర కిలో చక్కెర కలపి 2 గ్రా. నిమ్మ ఉప్పును కలిపి చిక్కబడే వరకు మరగించడం ద్వారా జాము తయారు చేయవచ్చును. ఇందులో మొత్తం చెక్కర శాతము 68 బ్రిక్స్‌ ఉండును.

తాటి తాండ్ర లేదా ప్రూట్‌ బార్‌ :
తాటి గుజ్జుకు తగినంత పరిమాణంలో చక్కెర కాని తాటి చక్కెర కాని కలిపి 0.5% నిమ్మ ఉప్పును 0.1% సోడియం బెంజోయేట్‌ కలిపి ఎండలో గాని వేడి గాలి యంత్రాలలో గాని, ఎండబెట్టడం ద్వారా తయారు చేయవచ్చు.

చిక్కబడిన గుజ్జు :
తాటి గుజ్జును 0.1% సోడియం బెంజోయేట్‌ కలిపి అరగంట సేపు వేడిచేసి పరిశుభ్రమైన సీసాలలో నింపడం ద్వారా నిల్వ ఉంచవచ్చును.
తాటి గుజ్జును ఫోమింగ్‌ ఎజెంట్‌తో కలిపి ఎండబెట్టడం ద్వారా పిండి రూపంలోకి మార్చవచ్చును. దీన్ని ఉపయోగించి చాక్లెట్స్‌, బిస్కెట్స్‌ మరియు ఇతర అనేక రకాలైన ఆహార పదార్ధాలు తయారు చేయవచ్చును.

Als0 Read: Kiwi Cultivation: కివీ సాగు ఆమె జీవితాన్నే మార్చేసింది.. 24 ఏళ్ల కాశ్మీరీ యువరైతు విజయం.!