రైతు సోదరులు తాము పండించే పంటలలో వచ్చే వివిధ రకాల పురుగులు, తెగుళ్లు మరియు కలుపు మొక్కల నుండి పంటలను కాపాడుకోవడానికి వివిధ రకాల రసాయనిక మందులను వాడుతున్నారు. అయితే గత కొన్ని సంవత్సరాలుగా వివిధ పంటలలో ఈ రసాయనాలను తెలియకుండానే కొద్ది మోతాదులో ఎక్కువగా వాడడం మరియు ఎక్కువసార్లు పంటలపై పిచికారి చేయడం వలన అనేక దుష్ప్రభావాలు చూడడం జరుగుతుంది. అంతేకాకుండా ఈ రసాయనక మందులను అధికంగా వినియోగించడం వలన నీరు గాలి కలుషితం అవడం జరుగుతుంది మరియు ఇతర జీవరాశులపై మేలు చేసే పురుగులపై మరియు పరాగ సంపర్కంలో తోడ్పడే తేనెటీగలపై ఇవి దుష్ప్రభాన్ని చూడడమే కాకుండా ఈ రసాయనాల అవశేషాలు పంట ఉత్పత్తులలో ఉండడం వలన మనుషుల ఆరోగ్యంపై కూడా ప్రభావం చూపడం జరుగుతుంది.
కావున ఈ విషయాలను దృష్టిలో ఉంచుకొని రసానిక మందులను చాలా జాగ్రత్తగా అవసరం మేరకే వాడినట్లయితే దీని వల్ల కలిగే నష్టాన్ని తగ్గించుకోవడానికి ఆస్కారం ఉంది. అంతేకాకుండా సమగ్ర సస్యరక్షణలో భాగంగా ఈ రసాయనాలను ఆఖరి అస్త్రంగా మాత్రమే ఉపయోగించాలి.
రసానికి మందులను వినియోగించేటప్పుడు తీసుకోవలసిన కొన్ని జాగ్రత్తలు :
- పంట పొలంలో చీడపీడలు కనిపించడం వెంటనే రసానిక మందులను పిచికారి చేయవలసిన అవసరం లేదు వీటి యొక్క ఉధృతి ఒక స్థాయి దాటినప్పుడు మాత్రమే మనకు నష్టం అనేది వాటిల్లుతుంది
- పంటలలో ఉన్న సమస్యలను బట్టి రసాయనిక మందులను ఎంపిక చేసుకోవాలి ఉదాహరణకు కీటకాలను చంపడానికి కీటకనాశులను మరియు తెగుళ్లను నివారించడానికి ఉపయోగించాలి
- పురుగులు మరియు తెగుళ్ల ఉధృతిని బట్టి సరైనటువంటి రసానికమందును అధికృత డీలర్ల వద్ద మాత్రమే కొనుగోలు చేసి రసీదు తీసుకోవాలి.
- ఎంచుకున్న రసానికమందును సరైన సమయంలో సరైన పద్ధతిలో మరియు సరైన మోతాదులో పిచికారి చేసినట్లయితే ఉపయోగకరంగా ఉంటుంది.
- రసానిక మందులను పిచికారి చేసేటప్పుడు తగినటువంటి జాగ్రత్త చర్యలు తీసుకున్నట్లయితే వాటి వల్ల కలిగే హాని పిచికారి చేసే వ్యక్తిపై ఉండదు.
- సాధ్యమైనంతవరకు రసానికమందులను గాలివాటంకు ఎదురుగా పిచికారి చేయరాదు. అంతేకాకుండా వీలైనంతవరకు ఉదయం మరియు సాయంత్రం వేళల్లో పిచికారి చేసినట్లయితే లాభదాయకంగా ఉంటుంది.
- రెండు లేదా మూడు రసాయనాలు కలిపి పిచికారి చేయవలసి వచ్చినప్పుడు ఆ రసాయనాలు కలిపి పిచికారి చేసినప్పుడు ఏమైనా దుష్ప్రభావాలు పంటపై ఉంటాయా లేదో తెలుసుకొని వినియోగించుకోవాలి
- ఒకే రకమైన రసాయనిక మందులను పంట కాలంలో ఎక్కువసార్లు పిచికారి చేయరాదు
- మనం వాడే రసాయనాలను బట్టి పిచికారికి వాడే నాజిల్స్ను మార్చుకున్నట్లయితే రసాయనాలు మంచిగా పని చేసి ఉపయోగకరంగా ఉంటుంది.
అంతేకాకుండా కేవలం రసాయనాల మీదనే ఆధారపడకుండా ప్రత్యామ్నాయ పద్ధతులను పాటించినట్లయితే సాధ్యమైనంతవరకు ఈ రసాయన వల్ల కలిగే నష్టాన్ని తగ్గించుకోవచ్చు ఇందుకోసం రైతు సోదరులందరూ సమగ్ర సస్యరక్షణ పద్ధతులను పాటించాలి.
రసాయనక మందులకు ప్రత్యామ్నాయంగా పాటించాల్సిన సమగ్ర సస్యరక్షణ పద్ధతులు :
- వేసవికాలం లోతుతుక్కులు చేసుకోవాలి.
- చీడపీడలను తట్టుకునే వంగడాలను సాగు చేయాలి.
- వివిధ పంటల్లో విత్తన శుద్ధిని విధిగా పాటించాలి ఇందులో భాగంగా కిలో విత్తనానికి 10 గ్రాముల ట్రైకోడెర్మా విరిడి లేదా సూడో మోనాస్ తో విత్తన శుద్ధి చేయాలి.
- అంతర పంటలను సాగు చేయాలి వీటివల్ల మిత్ర పురుగుల సంఖ్య పెరుగుతుంది.
- ఆముదం మరియు బంతి మొక్కలను ఎరపంటలుగా పొగాకు లద్దె పురుగుకు మరియు శనగపచ్చ పురుగు నివారణకు వేసుకోవాలి.
- రసం పీల్చే పురుగుల ఉధృతి ఉన్న పంటలలో పంటల చుట్టూ రెండు మూడు వరసలలో జొన్న లేదా మొక్కజొన్న పంటలను కంచ పంటలుగా వేసుకోవాలి. అంతేకాకుండా ఈ రసం పీల్చే పురుగుల నివారణకు 20 పసుపు లేదా నీలం రంగు జిగురు అట్టలను ఏర్పాటు చేయాలి.
- పురుగుల ఉనికిని గుర్తించడానికి లింగాకర్షణ బుట్టలను ఎకరానికి నాలుగు చొప్పున పెట్టుకోవాలి.
- వీలైనంతవరకు వృక్ష సంబంధ మందులైనటువంటి వేప నూనెను పిచికారి చేయాలి.
Readmore :-కంది పంట పూత దశలో..ఏయే చీడపీడలు ఆశిస్తాయి? వాటిని ఎలా నివారించుకోవాలి?
ఎస్.ఓం ప్రకాష్, వై. ప్రశాంత్, వి. వెంకన్న, ఎం. శ్రీధర్, ప్రాంతీయ వ్యవసాయ పరిశోధన స్థానం, వరంగల్, ఫోన్ : 9866373563


























