గుంటూరు డీసీఎంఎస్ ప్రధాన కార్యాలయంలో ఈరోజు పారాదీప్ ఫాస్ఫేట్స్ లిమిటెడ్ (PPL) ఆధ్వర్యంలో డీసీఎంఎస్ సిబ్బంది, పల్నాడు జిల్లా బ్రాంచ్ ఇన్ఛార్జ్లకు వ్యవసాయ ఉత్పత్తులపై అవగాహన సదస్సు నిర్వహించారు. ఈ సందర్భంగా PPL నూతన ఉత్పత్తులను పరిచయం చేసి, జ్యోతి ప్రజ్వలనతో కార్యక్రమాన్ని ప్రారంభించారు.
ఈ సందర్భంగా PPL రీజినల్ హెడ్ రఫీ గారు మాట్లాడుతూ, చైర్మన్ వడ్రాణం హరిబాబు గారి నాయకత్వంలో డీసీఎంఎస్ అభివృద్ధి పథంలో ముందుకు సాగుతోందని అన్నారు. వ్యవసాయం, రైతుల సంక్షేమం, సంస్థ అభివృద్ధిపై ఆయనకు ఉన్న నిబద్ధత అభినందనీయమని, మైక్రో న్యూట్రియంట్స్, సేంద్రియ వ్యవసాయంపై ఆయన చూపుతున్న ఆసక్తి రైతులకు ఎంతో ఉపయోగకరమని పేర్కొన్నారు. చైర్మన్ బాధ్యతలు చేపట్టినప్పటి నుంచి సంస్థ వ్యాపారాన్ని రూ.80 కోట్ల స్థాయి నుంచి రూ.100 కోట్ల స్థాయికి తీసుకెళ్లడంతో పాటు, సంస్థకు లాభాలు ఆర్జించేలా కృషి చేస్తున్నారని ప్రశంసించారు. వివిధ ప్రముఖ కంపెనీలతో భాగస్వామ్యాలు కుదుర్చుకుంటూ సంస్థ అభివృద్ధికి కొత్త వ్యాపార అవకాశాలను కల్పిస్తున్నారని తెలిపారు. ఇందులో భాగంగా PPL ఉత్పత్తులను డీసీఎంఎస్ ద్వారా రైతులకు అందించేందుకు ముందుకు వచ్చామని, వివిధ పంటలకు ఏయే ఉత్పత్తులు అవసరం, వాటిని ఏ విధంగా వినియోగించాలనే అంశాలపై సిబ్బందికి అవగాహన కల్పిస్తున్నామని చెప్పారు.
చైర్మన్ వడ్రాణం హరిబాబు గారు మాట్లాడుతూ, ముఖ్యమంత్రి శ్రీ నారా చంద్రబాబు నాయుడు గారి రైతు సంక్షేమ లక్ష్యాలు, ఉప ముఖ్యమంత్రి శ్రీ పవన్ కళ్యాణ్ గారి ఆలోచనలు, మంత్రి శ్రీ నారా లోకేష్ గారి అభివృద్ధి దిశానిర్దేశానికి అనుగుణంగా సహకార రంగాన్ని బలోపేతం చేయడమే తమ లక్ష్యమన్నారు. రైతులకు నాణ్యమైన ఎరువులు, సూక్ష్మ పోషకాలు, సేంద్రియ వ్యవసాయ ఉత్పత్తులను అందుబాటులోకి తీసుకువచ్చి దిగుబడులు పెంచేందుకు కృషి చేయాలన్నారు. PPL ఉత్పత్తులను డీసీఎంఎస్ బ్రాంచ్ల ద్వారా రైతులకు చేరువ చేసి, సంస్థకు మరింత ఆదాయం, లాభాలు పెంపొందించేలా సిబ్బంది పనిచేయాలని సూచించారు.
సంస్థ అభివృద్ధిలో భాగంగా PMFME పథకం ద్వారా గానుగ ఉత్పత్తుల తయారీ, వాటర్ ప్లాంట్ల ఏర్పాటు వంటి కార్యక్రమాలను చేపట్టేందుకు ప్రణాళికలు రూపొందిస్తున్నామని తెలిపారు. ప్రస్తుత వాతావరణ పరిస్థితులు, ఎల్నినో ప్రభావం కారణంగా వ్యవసాయ రంగంలో కొన్ని సవాళ్లు ఎదురైనప్పటికీ, సంస్థకు ప్రత్యామ్నాయ వ్యాపార అవకాశాలను కల్పిస్తూ ఆర్థికంగా మరింత బలోపేతం చేసేందుకు చర్యలు తీసుకుంటున్నామని పేర్కొన్నారు. ఇతర డీసీఎంఎస్ బ్రాంచ్లలోనూ ఇటువంటి అవగాహన కార్యక్రమాలు నిర్వహించి, రైతులకు ఆధునిక వ్యవసాయ పద్ధతులు, ఎరువులు, సూక్ష్మ పోషకాల వినియోగంపై అవగాహన కల్పించాలని సూచించారు.
ఈ సందర్భంగా ఉద్యోగులు మాట్లాడుతూ, చైర్మన్ వడ్రాణం హరిబాబు గారు బాధ్యతలు చేపట్టిన అనంతరం ఉద్యోగుల వేతనాలు పెంచడంతో పాటు, సిబ్బంది సంక్షేమానికి ప్రత్యేక ప్రాధాన్యత ఇస్తున్నారని తెలిపారు. ఉద్యోగులకు ఇన్సూరెన్స్ సౌకర్యం కల్పించేందుకు కూడా చర్యలు చేపడుతున్నారని, సంస్థ అభివృద్ధితో పాటు ఉద్యోగుల బాగోగుల పట్ల చైర్మన్ గారు చూపుతున్న శ్రద్ధ, నిబద్ధత అభినందనీయమని హర్షం వ్యక్తం చేశారు.
ఈ కార్యక్రమంలో డీసీఎంఎస్ బిజినెస్ మేనేజర్ జె.వి. సుబ్బారావు, ప్రొక్యూర్మెంట్ ఆఫీసర్ రవీంద్రబాబు, ఆఫీస్ మేనేజర్ శ్రీనివాస్, PPL రీజినల్ హెడ్ ఎస్.ఎం.డి. రఫీ, పి.వి. సుభాష్, నజ్రుల్ ఇస్లాం, ప్రియ, ఎ. లింగారెడ్డి, రవీంద్రనాథ్, పల్నాడు జిల్లా డీసీఎంఎస్ బ్రాంచ్ ఇన్ఛార్జ్లు, ఇతర సిబ్బంది పాల్గొన్నారు.
Leave Your Comments


























