Published By 
ఉద్యాన పంటల్లో చీడపీడల ఉధృతిని ముందుగానే గుర్తించి, రైతులకు సకాలంలో శాస్త్రీయ సలహాలు అందించేందుకు శ్రీ కొండా లక్ష్మణ్ తెలంగాణ ఉద్యాన విశ్వవిద్యాలయం (SKLTGHU – ములుగు) మరియు ఫైల్లో (Fyllo) సంస్థకు చెందిన అగ్రిహాక్ టెక్నాలజీస్ ప్రైవేట్ లిమిటెడ్ (బెంగళూరు) మధ్య అవగాహన ఒప్పందం (MoU) కుదిరింది. ఈ సందర్భంగా విశ్వవిద్యాలయ ఉపకులపతి “డాక్టర్ దండా రాజిరెడ్డి” మాట్లాడుతూ, ఉద్యాన రైతులు చీడపీడల నివారణకు అవసరానికి మించి పురుగుమందులు వినియోగించకుండా, శాస్త్రీయ ఆధారాలతో కూడిన సమయోచిత నిర్ణయాలు తీసుకునేందుకు ఈ ఆధునిక సాంకేతిక పరిజ్ఞానం ఎంతగానో దోహదపడుతుందని తెలిపారు.
ఈ నూతన వ్యవస్థలో స్మార్ట్ పెస్ట్ ట్రాప్ (Smart Pest Trap), ఆటోమేటిక్ వెదర్ స్టేషన్ (AWS), మరియు నిర్ణయ సహాయక వ్యవస్థలను (Decision Support System) సమన్వయం చేయడం ద్వారా పంటల స్థాయిలో చీడపీడల ఉనికిని గుర్తించి, వాటి తీవ్రతను ముందుగానే అంచనా వేస్తారని ఉపకులపతి వివరించారు. పొలాల్లో ఏర్పాటు చేసే స్మార్ట్ పెస్ట్ ట్రాప్‌లకు అమర్చిన ఆకర్షణీయమైన ల్యూర్ ద్వారా కీటకాలను సేకరించి, అందులోని కెమెరా మరియు ఇమేజ్ ఆధారిత ఆర్టిఫిషియల్ ఇంటెలిజెన్స్ (AI) సాంకేతికతతో వాటిని గుర్తించి సంఖ్యను ఆటోమేటిక్‌గా లెక్కిస్తారు. ఈ వివరాలను ఆర్థిక నష్ట పరిమితి (Economic Threshold Level – ETL)తో పోల్చి, చీడపీడల ఉధృతి పరిమితిని దాటినప్పుడు మాత్రమే పురుగుమందుల పిచికారీకి సంబంధించి రైతులకు సలహాలు అందిస్తారు. అదేవిధంగా, ఆటోమేటిక్ వెదర్ స్టేషన్ ద్వారా ఉష్ణోగ్రత, గాలిలో తేమ, వర్షపాతం తదితర వాతావరణ వివరాలను నిరంతరం నమోదు చేస్తూ, ప్రాంతీయ పరిస్థితులకు అనుగుణంగా రైతులకు ముందస్తు హెచ్చరికలు జారీ చేస్తారు.
ఈ సాంకేతిక వ్యవస్థ అమలుతో పురుగుమందుల అనవసర వినియోగం తగ్గి, సాగు ఖర్చులు తగ్గడంతో పాటు పర్యావరణ పరిరక్షణ, మిత్ర పురుగుల సంరక్షణ మరియు నాణ్యమైన ఉద్యాన ఉత్పత్తుల సాధనకు అవకాశం కలుగుతుందని ఆయన పేర్కొన్నారు. ఖచ్చితమైన సమయంలో, అవసరమైన మేరకే సస్యరక్షణ చర్యలు చేపట్టడం ద్వారా పంట నష్టాలను తగ్గించి, రైతుల ఆదాయాన్ని పెంపొందించడమే ఈ కార్యక్రమ ప్రధాన లక్ష్యమని తెలిపారు. ఈ కార్యక్రమం ఉద్యాన రంగంలో ప్రెసిషన్ ప్లాంట్ ప్రొటెక్షన్, సుస్థిర వ్యవసాయం మరియు డిజిటల్ సాగు దిశగా ఒక ముఖ్యమైన ముందడుగు కానుందని ఆశాభావం వ్యక్తం చేశారు.
ఈ కార్యక్రమంలో విశ్వవిద్యాలయ డా.ఏ. భగవాన్, ఫైల్లో (Fyllo) సంస్థ సలహాదారు మాజీ వైస్ ఛాన్సలర్ డా. ఎస్. డి. శిఖామణి, డీన్ ఆఫ్ హార్టికల్చర్ & స్టూడెంట్స్ అఫైర్స్ J. చీనా, డా. డి. లక్ష్మీనారాయణ, డా. టి. సురేష్ కుమార్, డా. కె. వీరాంజనేయులు, డా. జి. పి. సునందిని,డాక్టర్ డి. అనితాకుమారి మరియు డా. జి. సతీష్ తదితరులు పాల్గొన్నారు.
Leave Your Comments
