ఉద్యానశోభచీడపీడల యాజమాన్యంవ్యవసాయ పంటలు

రాజ్మా సాగులో అధిక దిగుబడికి పాటించవలసిన  పద్ధతులు

0

విశాఖపట్నంలోని ఏజేన్సీ ప్రాంతంలో ముందస్తు రబీ పంటగా రాజ్మా పంటను పండిస్తారు. ఈ పంట అధిక మంచు మరియు మురుగు నీటి నిల్వకు తట్టుకోలేదు. ఈ పంట పెరుగుదలకు అనువైన ఉష్ణోగ్రతలు 10 – 27°C. ఉష్ణోగ్రత సాధారణంగా కంటే అధికంగా (>30° C) ఉన్న యెడల పూత రాలడం ప్రధాన సమస్యగా మారుతుంది. మరియు తక్కువగా (-5° C) ఉన్న యెడల మొక్క శాఖీయాభివృద్ధి చెందదు. అదే విధంగా పూత మరియు కాయలు కూడా అభివృద్ధి చెందక గిడసబారి పోతాయి.

నేలలు :-   నీరు ఇంకే ఇసుక మరియు బంక మట్టి నేలలు, మురుగు నీటి వసతి ఉండి నేలలో తగినంత తేమ నిలుపుకునే నేలలు ఈ పంటకు అనుకూలం. అధిక వర్షపాతం గల నేలలు ఎక్కువగా ఆమ్ల నేలలు అయిన కారణంగా వీటికి సున్నంను (7.2 ట/ఎకరాకు) వేసుకొని పునరుద్ధరణ చేసుకోవచ్చును. విత్తుటకు ముందే సున్నంను పాలంలో వేసి కలియదున్నడం వలన అధిక దిగుబడులను సాధించవచ్చును.

విత్తే సమయం :-   ఆగష్టు రెండవ పక్షం నుండి సెప్టెంబర్ మొదటి పక్షం వరకు విత్తుకోవచ్చు. నీటి పారుదల సౌకర్యం గల నేలలో జనవరిలో కూడా విత్తుకోవచ్చు. సెప్టెంబర్ రెండవ పక్షం తరువాత విత్తడం వల్ల దిగుబడులు గణనీయంగా తగ్గుతాయి.

విత్తన మోతాదు మరియు విత్తుట :-  ఎకరాకు 20 కిలోలు విత్తనము అవసరము. నేలను బాగా దున్ని చక్కని పదును వచ్చేటట్లు చేయాలి. విత్తేటప్పుడు వరులలో 30సెం.మీ., మొక్కకు మొక్కకు మధ్య 10 సెం. మీ.. దూరాన్ని పాటించి విత్తుకోవాలి.

విత్తన శుద్ధి :-    ఇమిడాక్లోప్రిడ్ (గౌచో 600 ఎఫ్.ఎస్) 4 మి.లీ ను ఒక కిలో విత్తనానికి కలిపి విత్తన శుద్ధి చేసుకోవాలి. ఇలా విత్తన శుద్ధి చేసుకోవడం వలన పంట తొలి దశలో వచ్చే కాండపు ఈగ మరియు కాండపు కుళ్లు తెగుళ్ళును సమర్ధవంతంగా అరికట్టవచ్చు.

ఎరువుల యాజమాన్యం :-   ఎకరాకు 8 -10 టన్నుల పశువుల ఎరువును వేసి బాగా కలియదున్నాలి. ఎకరాకు 100 – 120 కిలోల నత్రజని, 80-100 కిలోల భాస్వరం మరియు 60 కిలోల పొటాష్ను వేసుకోవాలి. ఆఖరి దుక్కిలో 50 – 60 కిలోల నత్రజని మరియు మొత్తం భాస్వరం ఎరువును వేసి కలియదున్నాలి. రెండవ దఫా నత్రజని 50 – 60 కిలోలు పూత సమయంలో వేసుకోవాలి.

అంతర కృషి :-    రాజ్మా పంటలో కలుపు నివారణకు ఎకరాకు 1.2 లీటర్లు పెండిమిథాలిన్ విత్తిన 24 – 48 గంటల లోపు పిచికారి చేసుకోవాలి. పంట 30 రోజులలోపు కలుపు నివారణకు ఇమిజితాపైర్ (పర్సూట్) 1.25 మి.లీ., లీటరు నీటికి కలిపి పిచికారి చేసుకోవాలి. రాజ్మా పంటలో కలుపు అధికంగా ఉంటే దిగుబడులు గణనీయంగా తగ్గుతాయి.

READMORE:-రాజ్మా చిక్కుళ్ల సాగు – విత్తనోత్పత్తి

నీటి యాజమాన్యం :-  ఈ పంట మొక్కలు వేళ్ళు పైపైన ఉండుట వలన అధికంగా తేమను తట్టుకో లేవు. నీటి పారుదల సౌకర్యం గల నేలల్లో పూతదశ ముందు ఒకేసారి నీరు పెట్టడం వలన మంచి పూత వస్తుంది. కాయ ఏర్పడిన తర్వాత రెండవ సారి నీరు పెట్టాలి. పుష్పించేటప్పుడు మరియు కాయ ఏర్పడేటప్పుడు తేమ తప్పనిసరిగా ఉండేలా చూసుకోవాలి.

సస్యరక్షణ :-

కాండపు ఈగ :- విత్తిన 30 రోజుల వరకూ ఈ పురుగు ఉధృతిని గమనించవచ్చు. ఈ పురుగు ఎక్కువగా ఆలస్యంగా విత్తిన పంటకు (అక్టోబర్ నుంచి నవంబర్) ఆశించి నష్టం కలుగజేస్తుంది. ఈ పురుగు ఆశించిన మొక్క కాండంలో రంధ్రాలు సొరంగం మాదిరిగా ఉండడం, కాండం ఉబ్బి ఉండడం మరియు కాండం పై చీలిక ఉండడం గమనించవచ్చు.

యాజమాన్యం :

  •  సకాలంలో విత్తుకోవాలి.
  • ఇమిడాక్లోప్రిడ్ (గౌచో 600 FS) 4 మి.లీ., కిలో విత్తనానికి కలిపి విత్తనశుద్ధి చెయ్యాలి.

పెంకు పురుగులు :-

  •  ఈ పెంకు పురుగులు పంట తొలి దశలో ఆకులపై ఆశించడం వల్ల ఆకులపై చిన్న చిన్న రంధ్రాలు గమనించవచ్చు.
  • వేపనూనె 2 మి.లీ., లీటరు నీటికి కలిపి పంట తొలి దశలో పిచికారి చేసుకోవాలి.

రసం పీల్చు పురుగులు (పేను, దీపపు పురుగు, పేనుబంక, నల్లి) :

  • రసంపీల్చు పురుగులు విత్తనం మొలకెత్తిన దశ నుంచి పంట కోత దశ వరకు ఆశిస్తాయి.
  • ఆగస్టు మరియు సెప్టెంబర్ మాసంలో అధిక వర్షాలు కారణంగా వీటి ఉధృతి కంటే చాలా తక్కువగా ఉంటుంది.
  • ఆలస్యంగా విత్తిన పంటల్లో రసం పీల్చు పురుగుల ఉధృతి ఎక్కువగా ఉండటం వలన దిగుబడులు గణనీయంగా తగ్గుతాయి.
  • పేనుబంక లాంటి రసం పీల్చు పురుగులు ద్వారా వెర్రి తెగులు ఒక మొక్క నుంచి ఇంకో మొక్కకు వ్యాప్తి చెందడం జరుగుతుంది.

యాజమాన్యం:-

  • ఇమిడాక్లోప్రిడ్  4 మి.లీ., కిలో విత్తనానికి కలిపి విత్తనశుద్ధి చేసుకోవాలి.
  • వేప మానె 2 మి.లీ ను లీటరు నీటికి కలిపి విత్తిన 20 రోజులకు మరియు డైమిథోయేట్  2 మి.లీ లీటరు నీటికి కలిపి పిచికారి చేసకోవాలి.

తెగుళ్ళు :-

కాండపు కుళ్ళు తెగులు :-  ఈ తెగులు పంట తొలి దశలో (30 రోజుల లోపు) ఎక్కువగా గమనించడం జరుగుతుంది. తేమతో కూడిన వాతావరణం ఈ తెగులుకు అనుకూలం.

యాజమాన్యం :-

  •  కార్బండిజమ్  2 గ్రా. కిలో విత్తనానికి కలిపి విత్తనశుద్ధి చెయ్యడం వల్ల ఈ తెగులును అరికట్టవచ్చు.
  • కార్బండిజమ్ లేదా మాంకోజెబ్ ఏ 2 గ్రా. లీటరు నీటికి కలిపి పిచికారి చేసుకోవాలి.

వెర్రి తెగులు :-

ఈ తెగులు పేనుబంక లాంటి రసం పీల్చు పురుగులు ద్వారా ఒక మొక్క నుంచి మరొక్క మొక్కకు వ్యాప్తి చెందడం జరుగుతుంది. ఈ వెర్రి తెగులు ఆశించనప్పుడు, ఆకులు వంకరటింకరగా అవుతాయి. మొక్క గిడసబారి పోతుంది, కాయలు చిన్నగా మరియు వంకరటింకరగా ఉండటం గమనించవచ్చు.

యాజమాన్యం :-

  • తెగులు సోకిన మొక్కలను ఏరివేసి, కాల్చివేయాలి.
  • డైమిథోయేట్ 2 మి.లీ. నీటికి కలిపి పిచికారి చేసుకోవాలి.

పక్షికన్ను తెగులు మరియు ఆకుమచ్చ తెగులు :

  • కార్బండిజమ్ 2 గ్రా కిలో విత్తనానికి కలిపి విత్తనశుద్ధి చెయ్యడం వల్ల ఈ తెగులును అరికట్టవచ్చు.
  • కార్బండిజమ్ లేదా మాంకోజెబ్ 2 గ్రా లీటరు నీటికి కలిపి పిచికారి చేసుకోవాలి.

కోత :-    రాజ్మా పంటను సకాలంలో కోత చేపట్టాలి. కోసిన తర్వాత 1 – 2 రోజుల్లో ఆరబెట్టి నూర్పు చేసుకోవాలి. పంటను సకాలంలో కోయని పక్షంలో గింజ రాలి, దిగుబడి తగ్గిపోతుంది. ఈ పంటను సకాలంలో విత్తుకొని మేలైన యాజమాన్య పద్ధతులు పాటిస్తే అధిక దిగుబడులు సాధించవచ్చు.

రాజ్మా పంటలో పాటించవలసిన సమగ్ర సస్యరక్షణ పద్ధతులు :

  • లోతైన వేసవి దుక్కులు చేసుకోవాలి.
  • మురుగు నీటి పారుదల సౌకర్యం గల నేలల్లో విత్తనాలు విత్తుకోవాలి.
  • పురుగులు, తెగుళ్ళు తట్టుకునే రకాలను సాగు చేయాలి.
  • విత్తనాలను విత్తుకునే ముందు ఎటువంటి పురుగులు, తెగుళ్లను సోకని విత్తనాలను విత్తుకోవడానికి ఎంపిక చేసుకోవాలి.
  • ఇమిడాక్లోప్రిడ్ (గౌచో 600 PS) 4 మి.లీ., కిలో విత్తనానికి కలిపి విత్తనశుద్ధి చేసుకోవాలి.
  • విత్తుకునేటప్పుడు విత్తిన లోతు 5 – 7 సెం.మీ. ఉండేలా చూసుకోవాలి.
  • పంటను సకాలంలో విత్తుకోవాలి.
  • అధిక సాంద్రత గల మొక్కలుంటే తీసివేయాలి. తద్వార కాండపు కుళ్లు మరియు వేరు కుళ్ళు తెగులు ఆరికట్టవచ్చు.
  • రాజ్మా పంటలో కలుపు లేకుండా చూసుకోవాలి.
  • తగినంత మోతాదులో పశువుల ఎరువు లేదా రసాయనిక ఎరువులను వేసుకోవాలి.
  • ఎకరానికి వేపపిండి  200 కిలోలను వేయడం వల్ల రాజ్మాలో వచ్చే తెగుళ్లను అరికట్టవచ్చు.
  • వెర్రి తెగులు సోకిన మొక్కలను ఏరివేసి, కాల్చివేయాలి.
  • పంట మార్పిడి ధాన్యపు పంటతో చేసుకోవాడం వల్ల పక్షికన్ను తెగులు మరియు ఆకుమచ్చ తెగులును ఆరికట్టవచ్చు.
  • చీడపీడల బెడద ఎక్కువగా ఉన్నప్పుడు, వేప నూనె 2 మి.లీను లీటరు నీటికి కలిపి విత్తిన 20 రోజులకు మరియు డైమిథోయేట్ 2 మి.లీ. లీటరు నీటికి కలిపి పిచికారి చేసుకోవాలి.

పి. జోగారావు, శాస్త్రవేత్త , బి.ఎన్. సందీప్ నాయక్, డా.డి.వెంకటేష్ బాబు, డా.కె. బయ్యపురెడ్డి, డా.డి. అదిలక్ష్మీ, ఎ.డి.ఆర్, ఆర్.ఎ.ఆర్.ఎస్, చింతపల్లి అల్లూరి సీతారామరాజు జిల్లా, ఫోన్ : 94927 25358

Leave Your Comments

ఆచార్య ఎన్.జి. రంగా వ్యవసాయ విశ్వవిద్యాలయాన్ని సందర్శించిన అమెరికా రాయబార కార్యాలయ సీనియర్ వ్యవసాయ నిపుణులు

Previous article

You may also like