ఆరోగ్యమైన లేయర్ పుల్లెట్ కోళ్లు – లాభాల సిరులు

లాభదాయకమైన లేయర్ల పెంపకం నాణ్యమైన పుల్లెట్ల పెంపకం నుండే ప్రారంభం అవుతుంది. తక్కువ వయసున్న పుల్లెట్ లు అండోత్పత్తి దశకు చేరే సమయానికి సరైన శరీర బరువు ఉన్నట్లయితే వాటి జన్యు సామర్థ్యాన్ని చేరుకోవడానికి వీలవుతుంది.

షెడ్ ఏర్పాటు చేసుకోవడం:

పాత బ్యాచ్ తీసి వేసిన తరువాత కొత్త బ్యాచ్ మొదలు పెట్టడానికి కనీసం 3 వారాల విరామ సమయాన్ని పాటించాలి. షెడ్ ని శుబ్రపరిచే ముందు షెడ్ లో ఉన్న మేత మరియు కోళ్ల లిట్టర్ ని తొలగించి, ఎలుకల నియంత్రణ కూడా చేపట్టాలి. షెడ్ మొత్తాన్ని అధిక ప్రెషర్ కలిగిన నీటి జెట్ వాషర్ సహాయంతో కడగాలి. ఇదే సమయంలో షెడ్ కి కావలసిన మరమ్మతులు చేయించుకుని పెట్టుకోవాలి. పాత బ్యాచ్ కోళ్లను తీసి వేసిన తర్వాత ఆ బ్యాచ్ లో ఉపయోగించిన ఫీడర్లు, డ్రింకర్లను తీసేసి ముందుగా డిటర్జెంట్ తో బాగా కడిగి, తర్వాత డిస్ఇన్ఫెక్టెంట్ ద్రావణం (Disinfectant solution)లో ఒక రాత్రి అంతా నానబెట్టి, మరుసటి రోజు శుభ్రమైన నీటితో కడిగి, ఎండలో ఆరబెట్టాలి. ఇలా చేయడం వలన బాక్టీరియా చనిపోతుంది. తరువాత పాత బ్యాచ్ లిట్టర్ అంతా పూర్తిగా తీసేయాలి.  కడిగే సమయంలో షెడ్డు పై కప్పు నుంచి మొదలు పెట్టి తర్వాత గోడలు, ఆపై నేలను శుభ్రం చేసుకోవాలి. నేలను ప్రెషర్ వాషెర్ సహాయంతో శుభ్రం చేసి, డిస్ఇన్ఫెక్టెంట్ ద్రావణాన్ని స్ప్రే చేయాలి. నేల మొత్తాన్ని ఫ్లేమ్ గన్ సహాయంతో కాల్చాలి, ఇలా కాల్చడం వలన క్రిములు, కోడి ఈకలు మరియు వాటిపై ఉండే క్రిములు అన్ని నశిస్తాయి. మట్టి నేల ఐతే పొడి సున్నాన్ని చల్లాలి, కాంక్రీట్ ఫ్లోర్ ఉన్నట్లయితే సున్నంతో వైట్ వాషింగ్ చేయించుకోవాలి. ఇదే సమయంలో వాటర్  ట్యాంక్ మరియు నీటి పరికరాలు అన్ని శుభ్రం చేసుకోవాలి. వాటర్ లైన్ లు శుభ్రపరుచుటకు encliklin, B904 , ఇతర డిస్ ఇన్ఫిక్టన్ట్ ద్రావణాలు వాడాలి, తర్వాత శుభ్రమైన నీటితో కడగవలెను.

కోడి పిల్లలు రాకముందు :

కోడిపిల్లలు రావడానికి 48 గంటల ముందుగానే షెడ్ రెడీ చేసుకోవాలి. కోడి పిల్లలు షెడ్ కి చేరుకునే సమయానికి షెడ్ ఉష్ణోగ్రత 35 డిగ్రీ సెంటీగ్రేడ్ ఉండేలా, షెడ్ సైజుని బట్టి ముందుగానే లైట్లు ఆన్ చేసుకోవాలి.దేని వలన షెడ్ లోపల వాతావరణం సరైన ఉష్ణోగ్రతకి చేరుకుండుతుంది. ఫీడర్లలో దాణా కనిపించేలా  వెలుతురు 30- 35 లక్స్ ఉండేలా చూసుకోవాలి. నాణ్యమైన తాజా చిక్ స్టార్టర్ దాణాని ఫీడర్లలో నింపాలి. అలాగే కోడి పిల్ల తాగడానికి అనువుగా డ్రింకర్లలో నీటిని నింపి తగిన ఎత్తులో అమర్చాలి. ఒత్తిడిని తగ్గించడానికి నీటిలో విటమిన్లు, ఎలెక్ట్రోలైట్స్ కలపాలి.

కోడి పిల్ల నాణ్యత:

కోడిపిల్లలను నాణ్యమైన పేరెంట్స్ / హేచరీ నుండి  తీసుకోవాలి. కోడిపిల్లలు మంచి బరువుతో పూర్తిగా ఆరిపోయి మరియు బొడ్డు బాగా నయమై ఉండాలి. కాళ్ళు నిటారుగా ఎలాంటి లోపాలు లేకుండా ఉండాలి. మొదటి రోజునే మారెక్స్ వ్యాధి రాకుండా హెచ్ వీటి (HVT) స్ట్రెయిన్ టీకా వేయించాలి.

బ్రూడింగ్ – అతి ప్రధానం :

కోడి పిల్లల జీవితంలో మొదటి రెండు వారాలు క్లిష్టమైనవి. అప్పుడే పుట్టిన కోడిపిల్లలు వాటి శరీర ఉష్ణోగ్రతను నియంత్రించుకోలేవు. కావున వాటికి అనువైన వాతావరణాన్ని అందించాలి. కేజ్ లో కోడి పిల్లల కాళ్ళు ఇరుక్కోకుండా  న్యూస్ పేపర్ని పరచాలి. కోడి పిల్లలను కేజ్ లో పెంచుతున్నట్లు ఐతే న్యూస్ పేపర్ మీద దాణాని చల్లి ఉంచాలి, ఇలా చేయడం ద్వారా కోడి పిల్లలలో దాణా తినడాన్ని ప్రేరేపించవచ్చు. కోడి పిల్లలు ఎంత తొందరగా తినడం మొదలుపెడతాయో అంత వేగంగా వాటి ఎదుగుదల ఉంటుంది. హేచరీ నుండి బయటికి వచ్చాక ఎంత తొందరగా తింటే అంత ఆరోగ్యాంగా ఉంటాయి, లేకపోతే డీ హైడ్రేషన్ వలన బలహీనం అవుతాయి. కేజ్ లలో పిల్లలు నేల మీద పిల్లల లాగా కదల్లేవు కాబట్టి వాటికి కావలసిన ఉష్ణోగ్రత మరియు తేమని అందించాలి.

బ్రూడర్ ఉష్ణోగ్రత మార్పు వలన కోడి పిల్లల ప్రవర్తనలో కలిగే మార్పులు

అధిక ఉష్ణోగ్రత , తక్కువ ఉష్ణోగ్రత, సరైన ఉష్ణోగ్రత

సరైన బరువును చేరుకోవడానికి కోడి పిల్లల నిర్వహణ :

ఒక క్రమబద్ధమైన సమతుల్యమైన పెరుగుదల రేటును అనుసరిస్తూ కోడి పిల్లలు ఎదుగుతాయి. ఎదిగేటప్పుడు వాటికి కావలసిన పోషణ, టీకాలు, సరైన నిర్వహణ, లైటింగ్ / వెలుతురు అందించినప్పుడు, కోళ్లు జాతి / బ్రీడ్ జన్యు సామర్థ్యాన్ని ప్రదర్శిస్తాయి. ఎదిగే దశలో బ్రీడ్ సామర్థ్యానికి తక్కువ బరువు ఉండే కోళ్ళలో అవయవాలు సరిగా అభివృద్ధి చెందక, దీని ప్రభావం గుడ్లు పెట్టే దశలో కన్పిస్తుంది. దీని వాళ్ళ గుడ్ల సంఖ్య తగ్గిపోవడం, చిన్న గుడ్లు రావడం లేదా దాణా వినియోగం తగ్గిపోవడం జరిగి రైతులు నష్టపోతారు.

ఎదిగే దశను 3  భాగాలుగా విభజించవచ్చు:

0 – 6 వారాల వయసు వరకు:

ఈ సమయంలో జీర్ణ వ్యవస్థ మరియు రోగ నిరోధక వ్యవస్థ బాగా అభివృద్ధి చెందుతాయి. ఈ సమయంలో ఎలాంటి పోషక లోపమైన, ఫారం నిర్వహణలో జరిగే లోపాలు ఈ రెండు వ్యవస్థలను శాశ్వతంగా దెబ్బ తీస్తాయి. దీని వలన కోళ్లు తేలికగా వ్యాధులకు గురి అవుతాయి.

6 – 12 వారాల వయసు వరకు :

ఈ సమయంలో కోళ్ల కండరాలు, ఎముకలు, ఈకలు వేగంగా వృద్ధి చెందుతాయి. 12 – 13  వారాల వరకు వచ్చే సరికి 95  % అస్థిపంజరం అభివృద్ధి చెందుతుంది. ఆ తరువాత ఎముకలలో ఎదుగుదల ఉండదు. కోడి అస్థిపంజరం పరిమాణాన్ని బట్టి గుడ్డు పెంకు నాణ్యత ఆధారపడి ఉంటుంది. ఎదుగుదల సరిగా లేని కోళ్ళ గుడ్డు పెంకు బలహీనంగా ఉండి గుడ్లు తొందరగా పగిలిపోవడం జరిగి రైతుకు నష్టం కలుగుతుంది.

13 – 17 వారాల వయసు వరకు:

ఈ సమయంలో శరీర ఎదుగుదల తగ్గి జననేంద్రియాలు వృద్ధి పెరిగి అండోత్పత్తి కి సిద్దం అవుతాయి. శరీరంలోని కండరాలు మరియు ఫ్యాట్ అభివృద్ధి సాగుతూనే ఉంటుంది. ఈ దశలో శరీర బరువు 17 -18  వారాలలో  ఉండాల్సిన దానికన్నా తక్కువగా ఉంటే అండోత్పత్తి ఆలస్యం అవుతుంది.

కోళ్లు ఎదిగే వయసులో – ముఖ్య దశలు :

1. బ్రూడింగ్ – ఉష్ణోగ్రత సరిగ్గా ఉండేలా చూడాలి. కాలాన్ని మరియు వయసును బట్టి ఉష్ణోగ్రతను మారుస్తూ ఉండాలి..
2. 5వ వారం కనీస శరీర బరువు 350 గ్రా. ఉండేలా చూసుకోవాలి. ప్రతి వారం సాంపిల్ బరువులు నిర్దిష్ట బరువుతో సరిచూసుకోవాలి. ఒకవేళ నిర్దిష్ట బరువు లేనట్లయితే దానికి గల కారణాలను వెంటనే సవరించుకోవాలి. ఉదాహరణకి దాణాలో పోషకాల లోపం, ఫీడర్ల మరియు డ్రింకర్ల సంఖ్య కావాల్సిన దానికన్నా తక్కువగా ఉండడం మరియు వాటి  ఎత్తు కోళ్ల  ఎత్తుకి  ఎప్పటికప్పుడు  సర్దుబాటు చేయాలి.

3. ముక్కు కత్తిరించడం బిక్ ట్రిమ్మింగ్ :

• కోడి పిల్లల ముక్కు ముందు భాగాన్ని బిక్ ట్రిమ్మర్ లో పెట్టి, సరైన ఉష్ణోగ్రత అనగా బ్లేడ్ 650 సెంటి గ్రేడ్ ఉష్ణోగ్రత కు చేరుకున్నాక కోడి పిల్ల పరిమాణం బట్టి ఈ సైజు రంద్రాన్ని వాడాలో నిర్ణయించుకోవాలి.
• ట్రిమ్మింగ్ బ్లేడ్ నారింజ ఎరుపు రంగుకు చేరినట్లయితే అది 650 సెంటీగ్రేడ్ ఉష్ణోగ్రత కలిగిఉన్నట్లు గుర్తించాలి.
• 10 -14 రోజుల వయసులో మొదటి సారి, 14 వారాల లోపు ఇంకొకసారి ముక్కును కత్తిరించుకోవాలి.
• రెండవసారి ముక్కు కత్తిరించడం 14 వారాల లోపు చేయాలి, తర్వాత చేస్తే అంటే 15 -17 వారాల వయసులో చేయడం వలన నొప్పికి దాణా మరియు నీరు సరిగా తీసుకోక పోషక లోపం జరిగి జననేంద్రియాల అభివృద్ధికి ఒత్తిడి కలిగి గుడ్లు పెట్టడం ఆలస్యమవడమే కాకుండా చిన్న గుడ్లు ఎక్కువ సంఖ్యలో వచ్చి రైతులు నష్టపోతారు.

4. సమయానికి బ్రూడర్ కేజ్ ల నుండి గ్రోవర్ కేజ్లోకి మార్చాలి.
5. బ్రూడింగ్ నుండి గ్రోయింగ్ షెడ్లలో ఒకేరకమైన నీటి వ్యవస్థని వాడాలి.

కోళ్లు ఎదిగే వయసులో – ముఖ్య అంశాలు :

శరీర బరువు పర్యవేక్షణ :

• ఒక వారం వయసు నుండి కోళ్లు గుడ్లు పెట్టడం ప్రారంభించే వయసు వరకు ప్రతి వారం కోడిపిల్లల బరువు చూడాలి. 4 వారల వరకు గ్రూప్ బరువు, 4 వారాల నుండి 18 వారాల వరకు విడివిడిగా బరువును చూడాలి. తరువాత రెండు వారాలకు ఒకసారి బరువులు చూసినట్లయితే సరిపోతుంది.
• కేజ్ లలో కోళ్లను ఒకే దగ్గరనుండి కాకుండా మొదటి కేజీలు, చివరి  కేజీలు  మరియు మధ్య కేజ్ లలో  నుండి తీసుకోవాలి. అదేవిధంగా  పైనుండి,  మధ్య  కేజ్ లు  మరియు కింద  వరస  కేజ్ లలో నుండి  కోళ్లను ఎంచుకోవాలి.
• ఇలా పర్యవేక్షించడం ద్వారా వాటి ఎదుగుదలలో సమస్యలను వెంటనే గుర్తించి దాణాలో మార్పులను సరిచేసుకోవచ్చు. తక్కువ బరువులున్న కోళ్లను గ్రేడింగ్ చేసి షెడ్ లో ఒకవైపు కేజ్ లలోకి మార్చి కొన్ని రోజులు వాటికి స్టార్టర్ దాణాని అందించాలి.

శరీర బరువు ఏకరూపత :

• శరీర బరువు ఏకరూపత అనేది భవిష్యత్తులో వాటి అండోత్పత్తి సామర్థ్యాన్ని నిర్ణయిస్తుంది. ఎదిగే వయసులో 85 % ఉండాలి, ఇలా ఉంటే అన్ని కోళ్లు ఒకేసారి అండోత్పత్తికి చేరి అధిక గుడ్లు ఉత్పత్తి చేస్తాయి.
• యూనిఫార్మిటీ అనేది కంపెనీ స్టాండర్డ్ తో సరిగా ఉంటే గుడ్ల ఉత్ఫత్తి మరియు గుడ్ల బరువులో తేడాలు లేకుండా ఉంటాయి, తద్వారా రైతు మంచి లాభాలను పొందవచ్చు.

లైటింగ్:

• లైటింగ్ అనేది గుడ్లు పెట్టె కోళ్ళలో చాలా ముఖ్యమైన ప్రక్రియ. సమయానికి లైటింగ్ అనేది ఇవ్వకపోతే గుడ్ల సంఖ్య తగ్గిపోయే ప్రమాదం ఉంది. లైటింగ్ లో రెండు అంశాలు – లైటింగ్ వ్యవధి మరియు తీవ్రత.
• మొదటి 3 రోజులు 23 గంటలు, 3 వ రోజు నుండి – 3 వారాల వరకు నెమ్మదిగా 23 గంటల నుండి 16  గంటల లైటింగ్ వ్యవధి కి తగ్గిస్తూ రావాలి. 4  వ వారం నుండి 7  వారం వరకు వారానికి ఒక రోజు చొప్పున 12 గంటల వ్యవధికి తగ్గించాలి. 8  వ వారం నుండి 16 / 17 వారం  లేదా నిర్ణీత శరీర బరువు వచ్చే వరకు సహజంగా వచ్చే లైటింగ్ మాత్రమే ఇవ్వాలి.  నిర్ణీత బరువు చేరుకున్నాక లైట్ తో ప్రేరేపించాలి.
• శరీర బరువు నిర్ణీత బరువు కన్నా తక్కువ ఉంటే లైట్ తో ప్రేరేపించడం ఆలస్యం చేయాలి.

కాంతి తీవ్రత:

నిర్ణీత బరువు రాకముందే లైటింగ్ ఇచ్చినా లేదా లైటింగ్ తీవ్రత 30 Lux కన్నా ఎక్కువ ఇస్తే కోళ్ళలో ప్రోలాప్స్ వచ్చే ప్రమాదం ఉంది. కావున లైటింగ్ ఇచ్చేముందు బరువు సరిచూసుకోవడం చాలా ముఖ్యం.

ఎదిగే దశలో ఎదురయ్యే సమస్యలు దీర్ఘ కాలంలో అండోత్పత్తి దశలో గుడ్ల సంఖ్య, సైజు మరియు గుడ్ల పెంకు యొక్క నాణ్యతపై ప్రభావం చూపుతాయి, కాబట్టి పూర్తి శ్రద్ధతో అన్ని అంశాలను పాటించి సరైన శరీర బరువు చేరుకునేలా పుల్లెట్ కోళ్లను పెంచినట్లయితే అధిక లాభాలను అందుకోవచ్చు.

పుల్లెట్ కోళ్లను పెంచే క్రమంలో పైన తెలిపిన విధంగా జాగ్రత్తలు పాటిస్తూ అవి గుడ్లు పెట్టడం ప్రారంభించిన తరువాత వచ్చే చాలా సమస్యలను అధిగమిస్తూ, ఆశించిన స్థాయిలో ఫలితాలను చూడవచ్చును.

డా.కె . ప్రశాంత్ కుమార్, అసిస్టెంట్ ప్రొఫెసర్, కోళ్ల శాస్త్ర విభాగం, పశు వైద్య కళాశాల, మామునూరు, వరంగల్, PVNR TVU,ఫోన్ :  7013179181