మన పవిత్ర వృక్షాలకు ముప్పు.. కల్పిత కుట్రలు కాదు, మన నిర్లక్ష్యమే..!

ఏరువాక : భారతీయ సనాతన జీవన విధానంలో చెట్లకు లభించినంత విశిష్ట స్థానం ప్రపంచంలో మరెక్కడా కనిపించదు. మన దైనందిన జీవితంలో, ఆచార వ్యవహారాల్లో రావి, మర్రి, వేప చెట్లకు అత్యున్నత ప్రాధాన్యం ఉంది. ప్రతికూల వాతావరణాన్ని తట్టుకుని, ఆధ్యాత్మికతను, ఆరోగ్యాన్ని, పర్యావరణ సమతుల్యతను అందించే ఈ వృక్ష రాజాలు భారతీయుల సాంస్కృతిక ముద్రకు సజీవ ప్రతీకలు. అయితే, ఇటీవలి కాలంలో సామాజిక మాధ్యమాల్లో ఒక సంచలనాత్మక ప్రచారం తీవ్ర చర్చనీయాంశమైంది. మన ఆధ్యాత్మిక, పర్యావరణ పునాదులను దెబ్బతీసేందుకు విదేశీ శక్తులు మన పవిత్ర వృక్షాలపై కుట్రపూరితంగా విష ప్రయోగాలు చేస్తున్నాయనేది ఆ ప్రచారం సారాంశం. ప్రజల్లో తీవ్ర ఆందోళన రేకెత్తిస్తున్న ఈ కథనాల్లో ఎంతవరకు నిజముందనేది శాస్త్రీయంగా విశ్లేషించుకోవాల్సిన అవసరం ఎంతైనా ఉంది.

ఆధారాల్లేని వదంతులు..

మన సాంప్రదాయ వృక్షాలపై విదేశాలు లేదా శత్రు దేశాలు ప్రణాళికాబద్ధంగా విష ప్రయోగాలు చేస్తున్నాయనడానికి ఎలాంటి అధికారిక, శాస్త్రీయ లేదా సైనిక ఆధారాలూ లేవు. భారత ప్రభుత్వ పర్యావరణ, అటవీ మంత్రిత్వ శాఖ (MoEFCC) గానీ, కేంద్ర అటవీ పరిశోధనా సంస్థ (ICFRE) గానీ ఇటువంటి కుట్రల గురించి ఎలాంటి ఆధారాలను నమోదు చేయలేదు. వృక్షశాస్త్ర నిపుణులు, వ్యవసాయ విశ్వవిద్యాలయాలు నిర్వహించిన పరిశోధనల్లో ఎక్కడా విదేశీ రసాయనాలు చల్లిన ఆనవాళ్లు లభించలేదు. సంచలనం కోసం, సామాజిక మాధ్యమాల్లో ఆందోళన రేకెత్తించడం కోసం ఇలాంటి “కుట్ర సిద్ధాంతాలు” (Conspiracy Theories) పుట్టుకొస్తుంటాయి. దేశీయ వృక్ష సంపదపై దాడి జరుగుతోందనే భయంతో ప్రజల్లో భావోద్వేగాలను రెచ్చగొట్టడం సులభం. కానీ ఆధారాలు లేని వార్తలను నమ్మడం వల్ల అసలైన పర్యావరణ సమస్య పక్కదారి పడుతుంది.

విధ్వంసానికి అసలు కారణాలు మనమే..

సమాజంలో శతాబ్దాల నాటి చెట్లు ఎండిపోవడానికి లేదా క్షీణించడానికి కారణం విదేశీ కుట్రల కంటే, దైనందిన జీవితంలో మనమే స్వయంగా చేస్తున్న పర్యావరణ విధ్వంసమే ప్రధాన కారణమని నిపుణులు స్పష్టం చేస్తున్నారు. ప్రధానంగా మూడు అంశాలు మన వృక్ష సంపదను దెబ్బతీస్తున్నాయి.

కళ్ళు చెమర్చే ‘కాంక్రీట్ చెర’: అభివృద్ధి, పట్టణీకరణ పేరుతో రహదారుల విస్తరణ జరుగుతోంది. ఈ క్రమంలో చెట్ల మొదళ్ల చుట్టూ అంగుళం కూడా మట్టి లేకుండా కాంక్రీట్, తార్ రోడ్లు వేసేస్తున్నారు. రావి, మర్రి చెట్ల వేళ్లు లోతుగా, విస్తారంగా పాకినప్పుడు వాటి పట్టును దెబ్బతీస్తూ మనం చేస్తున్న నిర్మాణాలు వాటి నాశనానికి కారణమవుతున్నాయి. వేళ్లకు కనీసం గాలి, నీరు అందకుండా పోతున్నాయి.

వాతావరణ మార్పులు, డైబాక్ (Dieback) తెగులు: ప్రపంచవ్యాప్తంగా మారుతున్న ఉష్ణోగ్రతలు, తేమ శాతం హెచ్చుతగ్గుల వల్ల కొత్త రకం కీటకాలు, శిలీంధ్రాలు (Fungi) విజృంభిస్తున్నాయి. ఇటీవలి కాలంలో వేప చెట్లు పెద్ద ఎత్తున ఎండిపోవడానికి ఫోమోప్సిస్ అజాడిరెక్టే (Phomopsis azadirachtae) అనే ఫంగస్ వల్ల వచ్చే ‘డైబాక్’ వ్యాధే కారణం. ఇది కొమ్మల చివరల నుండి మొదలై చెట్టు మొత్తాన్ని ఎండబెడుతుంది. ఇది పూర్తిగా సహజమైన, వాతావరణ మార్పుల వల్ల ప్రబలుతున్న వ్యాధి.

భూగర్భ జలాల క్షీణత, కాలుష్యం..

పారిశ్రామిక వ్యర్థాలు, రసాయనాలు భూమిలో కలవడం, ప్లాస్టిక్ కాలుష్యం పెరగడం వల్ల మృత్తిక లక్షణాలు మారిపోతున్నాయి. అపరిమితంగా నీటిని తోడేయడం వల్ల భూగర్భ జలాలు అగాధానికి పడిపోయి, వేసవిలో వృక్షాలకు కనీస తేమ అందక శుష్కించిపోతున్నాయి.

పరిష్కారం దిశగా అడుగులు..

మన రావి, వేప, మర్రి చెట్లను కాపాడుకోవాల్సిన బాధ్యత నిస్సందేహంగా మన అందరిపైనా ఉంది. అయితే ఆ ముప్పు విదేశీ విష ప్రయోగం వల్ల కాదు… మన నిర్లక్ష్యం, పెరిగిన కాలుష్యం, అశాస్త్రీయ పట్టణీకరణ వల్లే వస్తోందని గ్రహించాలి. ఈ సమస్యను ఎదుర్కోవడానికి తక్షణమే ఆచరణాత్మక చర్యలు చేపట్టాలి.

వృక్షాల మొదళ్ల చుట్టూ ఉన్న కాంక్రీట్‌ను, టైల్స్‌ను కనీసం 3 నుంచి 6 అడుగుల మేర తొలగించి, మట్టిని స్వేచ్ఛగా వదలాలి.

శాస్త్రీయ చికిత్స.. వేప చెట్లకు తెగుళ్లు సోకినప్పుడు అటవీ అధికారులు లేదా కృషి విజ్ఞాన కేంద్రాల (KVK) సలహాతో 1శాతం బోర్డో మిశ్రమం (Bordeaux mixture) లాంటి ఫంగీసైడ్లను పిచికారీ చేయాలి.

ప్రతి చెట్టు సమీపంలో ఇంకుడు గుంతలు ఏర్పాటు చేసి, వర్షపు నీటి ద్వారా భూగర్భ జలాలను పెంపొందించాలి. కల్పిత కుట్రలపై దృష్టి పెట్టడం మాని, మన పర్యావరణ తప్పులను సరిదిద్దుకున్నప్పుడే మన పవిత్ర వృక్ష సంపదను, స్వచ్ఛమైన గాలిని భావి తరాలకు అందించగలుగుతాం. అదృశ్య శక్తులను నిందించడం కంటే, దృశ్యమానమవుతున్న మన నిర్లక్ష్యాన్ని వీడటమే నేటి తక్షణ కర్తవ్యం.-పసుపులేటి శ్రీలక్ష్మి జర్నలిస్ట్ .