Published By 
గత కొన్ని సంవత్సరాలుగా సాగు విస్తీర్ణం పెరుగుతున్న పండ్ల తోటల్లో నేరేడు ఒకటి. ప్రజల్లో పెరుగుతున్న ఆరోగ్య స్పృహ కారణంగా, ఇనుము, పొటాషియం వంటి మేలు చేసే పోషకాలు గల నేరేడుని ఎక్కువగా కాలేయ సమస్యలు, గుండె రుగ్మతలు, మధుమేహ లక్షణాల నుండి ఉపశమనం పొందుటకు వినియోగిస్తున్నారు. అన్ని రకాల నేలలు, క్షీణించిన భూములు, ఉప్పు, చౌడు భూములలో కూడా సులువుగా సాగుయ్యే ఈ పంటను, మేలైన యాజమాన్య పద్ధతులను పాటించడం ద్వారా అధిక దిగుబడులను, ఆదాయాన్ని పొందవచ్చు.
నేరేడు సాగుకై కొమ్మంటు పద్ధతి లో వేరుమూలం పై 15 సెం.మీ ఎత్తులో అంటుకట్టిన, ఆరు నెలల నుండి సంవత్సరము వయస్సు ఉన్న మొక్కలను ఎంపిక చేసుకోవాలి. నాటడానికి 1X1X1మీ గుంతలను తీసి, తవ్విన మట్టికి 25-30 కిలోల బాగా చివికిన పశువుల ఎరువు, 1 కిలో సూపర్ ఫాస్పేట్, 1 కిలో వేపపిండి 200గ్రా 2 శాతం మిథైల్ పరాథియాన్ (ఫాలిడాల్) పొడి మందు కలిపి గుంతలను నింపాలి.
అల్లనేరేడు లో అధిక దిగుబడి సాదించడానికి మరియు నాణ్యమైన పండ్లు పొందడానికి కొమ్మ కత్తిరింపులు తప్పనిసరిగా చేయాలి. మొక్క మొదలు నుంచి 60 -100 సెం. మీ వరకు ఎటువంటి కొమ్మలను రానియకూడదు. ప్రధాన కాండం పై 2 లేదా 3 బలమైన కొమ్మలను ఎన్నుకొని పెరగనివ్వాలి. మిగతావి తీసివేయాలి. 3 నుండి 5 బలమైన కొమ్మలు అన్ని దిక్కులలో మరియు వాటిమీద ద్వితీయ శాఖలు ఉండేటట్లు చూసుకోవడం ద్వార గాలి, వెలుతురు బాగా ప్రసరిస్తుంది.
చెట్లు నాటిన తర్వాత 3-4 సంవత్సరాల వరకు జనుము, పిల్లిపెసర చల్లి 45 రోజులు (పూత వచ్చే ముందు) రొటవెటర్ తో దున్ని వేయడం వల్ల భూమి సారం పెరుగుతుంది. వేరుశనగ, అలసందలు, పెసలు, ఉలవలు, అండుకొర్రలు వేసుకోవచ్చు. నీరు ఇవ్వకుండా మొక్కలను సెప్టెంబర్ డిసెంబర్ వరకు బెట్టకు గురి చెయ్యడం ద్వార ఫిబ్రవరి లో పూత వస్తుంది. పిందే ఏర్పడి పెరిగే దశ లో నీటిని ఇవ్వడం ద్వార పిందే రాలడాన్ని తగ్గించుకోవచ్చు. పాలిథిన్ షీట్, వరిపొట్టు, వేరుశనగ పొట్టు వేసుకోవడం వల్ల కలుపు నివారించడమే కాకుండా నేలలో తేమ ఆవిరి కాకుండా ఉపయోగపడుతుంది.
ఒక సంవత్సరానికి, ఒక చెట్టుకి, లేత తోటల్లో 20 కిలోలు, కాపుఇచ్చే తోటల్లో 50-80కిలోల చొప్పున పశువుల ఎరువు వేయాలి. మొదటి సంవత్సరం 125గ్రా నత్రజని, 50 గ్రా భాస్వరం, 50గ్రా పోటాష్ ఇచ్చే ఎరువులను ఒక చెట్టుకి, ఒక సంవత్సరానికి వేయాలి. అదే మోతాదు ప్రతి సంవత్సరం పెంచుకుంటూ వెళ్ళాలి. అలా 8 వ సంవత్సరం వరకు పెంచి, ఆ తరువాత మోతాదుని స్థిరంగా ఉంచి (1 కిలో నత్రజని, 400గ్రా భాస్వరం, 400గ్రా పోటాష్ ఇచ్చే ఎరువులు) మొక్కలకు అందించాలి. అల్ల నేరేడు లో కొత్త చిగురు రెండు దపాలుగా వస్తుంది అనగా ఫిబ్రవరి నుండి మే మరియు ఆగష్టు నుండి అక్టోబర్. 5 నుండి 10 నెలలు ముదిరిన కొమ్మలమీద మాత్రమే ఎక్కువ పూత ఫిబ్రవరిలో వస్తుంది. హెక్టారుకి 10-12 తేనెటీగల పెట్టలని ఉంచడం వల్ల ఫలదీకరణ బాగా జరిగి ఎక్కువ దిగుబడి సాధించవచ్చు. 20 శాతం చక్కర ద్రావణం పిచికారి చేయడం వలన పుప్పొడి రేణువులు ఎక్కువగా ఫలదీకరణం జరగడానికి దోహదం చేస్తుంది. ఎక్కువ శాతం పూత మరియు పిందే మార్చ్ నెలలో గమనిచవచ్చు. జిబ్బరిల్లిక్ ఆమ్లం 60 పిపియం పూత దశలో ఒకసారి మరియు పిందే ఏర్పడిన దశలో మరోసారి 15 రోజుల వ్యవధిలో రెండు మార్లు పిచికారి చేయడం వలన పూత, పిందే రాలడాన్ని అరికట్టవచ్చు.
కాయ ముదురు ఊదా రంగులోకి వచ్చిన తర్వాత కోత ప్రారంభించాలి. పూత కొమ్మలో ఉన్న అన్ని కాయలు ఒకేసారి కోతకి రావు. అల్లనేరేడు పండ్లు పండిన వెంటనే కోయాలి. ఎందుకంటే అవి పండిన తరువాత చెట్టు మీద ఉండకుండా రాలిపోతాయి. పండ్లు కింద పడితే మార్కెట్ కి తీసుకెల్లి అమ్మడానికి రావు, అందుకని పండ్లని చేతితో మాత్రమే కోయాలి. ఒక సంవత్సరంలో ఏపుగా పెరిగిన విత్తనపు మొక్క నుండి 80-100 కిలోలు, అదేవిధంగా అంటు మొక్క నుండి 60-70 కిలోల పండ్ల దిగుబడి వస్తుంది.
అల్లనేరేడు పండ్లు తొందరగా పాడవుతాయి కాబట్టి ముందుగా పండ్లన్ని గ్రేడ్ చేసుకొని పెట్టుకోవాలి. ఇవి సాదారణ వాతావరణ పరిస్తుతుల్లో 2-3 రోజులు ఉంటాయి. రంధ్రాలు కలిగిన పాలిథిన్ బ్యాగుల్లో, 8-10 డిగ్రీల ఉష్ణోగ్రత మరియు 85-90 శాతం ఆర్థత దగ్గర 3 వారల వరకు నిల్వ చేసుకోవచ్చు.
పురుగులు మరియు తెగుళ్ళు:
ఆకు తినే గొంగళి పురుగు : గొంగళి పురుగులు ఎక్కువగా తొలకరి తర్వాతవచ్చే చిగుర్లను ఆశిస్తాయి. జూలై నుండి ఫిబ్రవరి మాసం వరకు వీటి ఉదృతి పెరగడానికి అవకాశం ఉంది. ఆకుతినే గొంగళి పురుగుల నివారణ కి వేపనూనె (అజాడిరెక్టిన్ 10,000 పి.పి.యం) 5 మి.లీ/లీటరు నీటిలో కలిపి ఆకులపై పిచికారి చేయాలి. తర్వాత క్వినాల్ ఫాస్ 2 మి.లీ లేదా క్లోరోపైరిఫాస్ 1 మీ.లి. లేదా ఎమామెక్టిన్ బెంజోఎట్ 0.4 గ్రా/లీటర్ నీటికి కలిపి పిచికారి చేయాలి.
ఆకు ముడత/ఆకు జల్లెడ గూడు పురుగు: రెక్కల పురుగు బూడిద రంగులో చిన్నగా ఉంది పూమోగ్గలపై, లేత ఆకులపై గుడ్లను పెడుతుంది. గొంగళి పురుగు గులాబీ గోధుమ రంగులో ఉండి, లేత ఆకులను గూడుగా చేసి లోపలి పదార్థాలను తింటుంది. ఒక్కొక్క గూడులో 3 నుండి 4 పురుగులు కనిపిస్తాయి. ఈ పురుగు ఉధృతి జూలై నుండి నవంబర్ నెల వరకు కనిపిస్తుంది. గూడుగా మారిసు ఆకులని తొలగించి నాశనం చేయాలి. వేపగింజల కషాయం 5 శాతం లేదా వేప నూనె 5 మి.లీ లీటరు నీటికి కలిపి పిచికారి చేయాలి. ప్రోఫినోఫాస్ 3 మి.లీ లీటరు నీటికి చొప్పున కలిపిన ద్రావణాన్ని పిచికారి చేయాలి.
పండుతొలుచు పురుగు : తల్లి పరుగు పిందెలపై గుడ్లని పెడుతాయి. లార్వాలు కాయ లోపలికి తొలచుకొనిపోయి గుజ్జును తిని బయటకు విసర్జిస్తాయి. కాయ మీద విసర్జించిన పదార్థం పచ్చిగా కనిపించింది అంటే పురుగు కాయ/ పండులోపల ఉంది అని గమనించాలి. పచ్చికాయ దశలో పురుగు మందును పిచికారి చేయాలి. పురుగు ఉదృతిని తగ్గించడానికి స్పెనోసాడ్ 0.2 మి.లీ. లీటర్ నీటికి లేదా సయాన్ ట్రనిలిప్రోల్ 0.1 మి.లీ. లీటర్ నీటికి పిచికారి చేయాలి.
పండు ఈగ : ఈ మధ్యకాలంలో పండు ఈగ ఉదృతి ఎక్కువ అయ్యింది. కాయలు పక్వానికి వచినప్పుడు వర్షాలు పడితే పండు ఈగ ఉదృతి ఎక్కువ అయి అపార నష్టం వాటిల్లుతుంది. ఈ పురుగు ఉదృతి జూన్-జూలై మాసాల్లో అధికంగా ఉ ంటుంది. అల్లనేరేడు తోటల మధ్యకాని, చుట్టూ కాని జామ, బొప్పాయి తోటలు ఉన్నట్లయితే వీటి ఉదృతి ఎక్కువగా ఉంటుంది. ఈ పండు ఈగ పిల్ల పురుగులు గుజ్జుని తిని పండ్ల కుల్లిపోయి రాలిపోయేలా చేస్తాయి. ఈ పురుగు ఆశించడం వల్ల కాయలు తినటానికి కాని, గుజ్జు /రసం తీయడానికి కానీ పనికిరాకుండా పోతాయి. రాలిపోయిన పండ్లను ఏరినాశనము చేయాలి. కోత అయ్యిన వెంటనే చెట్టుక్రింద దున్ని, పాలిడాల్ పొడి మందు వేయడం ద్వార కోశస్థదశను నాశనం చేయొచ్చు. స్పైనోసాడ్ 0.3 మీ.లి. లీటర్ నీటిలో కలిపి పిచికారి చేసుకోవాలి. మార్కెట్ లో లభ్యమయ్యే పండు ఈగ బుట్టలని ఎకరాకు 5 చొప్పున 5-6 అడుగుల ఎత్తులో కొమ్మలకి కట్టాలి.
ఆంత్రాక్నొస్: కాయల మీద మచ్చలు రావడం వల్ల అల్లనేరేడు పండ్లు కుల్లిపోతాయి. నివారణకి పిందే ఏర్పడిన తర్వాత కార్బెండజిం 1 గ్రా/లి. లేదా కాపర్ ఆక్సి క్లోరైడ్ 3 గ్రా/లి పిచికారి చేయాలి.
డా. యస్.మానస, శాస్త్రవేత్త (ఉద్యాన విభాగం), డా. కే. అంకయ్య కుమార్, కార్యక్రమ సమన్వయ కర్త, కృషి విజ్ఞాన కేంద్రం, ఊటుకూరు, కడప.
