Published By 
ప్రజల్లో ఆహార-ఆరోగ్య సృహ పెరుగుతున్న నేపథ్యంలో కొన్ని రకాల దేశ, విదేశీ జాతుల పండ్లకు మార్కెట్లో గిరాకీ పెరుగుతుంది. అందులో ఒకటి “అవకాడో”. మనదేశంలో గత మూడేళ్లుగా అవకాడో సాగు విస్తీర్ణం పెరుగుతుంది. ఈ మొక్కలకు గిరాకి 30% వరకు పెరిగింది. పరిమిత నీరు, పోషకాలు, శ్రమతో సాగు చేయడానికి అవకాశం ఉండటం, ధాన్యపు పంటలతో పోల్చితే అధికాదాయం రావడం, యాంత్రికరణకు అనుకూలం కావడం, పౌష్టిక విలువల (మంచి కొవ్వు పదార్థాలు తక్కువ చక్కెర శాతం) తో కూడిన ఆరోగ్యం ప్రయోజనాలు కలిగి ఉండటం, మార్కెట్లో ఈ పంటకు డిమాండ్ పెరగడానికి దోహదపడుతున్నాయి.
అవకాడో(పెర్సియా అమెరికానా) పంట 19వ శతాబ్దంలో సిలోన్ దేశం నుండి మన దేశానికి పరిచయం చేయబడినది. ఈ పంటలో 150 పైగా ఉపజాతులు ఉన్నాయి. అందులో గౌతమేళన్, మెక్సికన్, వెస్ట్ ఇండియన్ రేసులు సాగుకు బాగా అనుకూలం. మనదేశంలో ఈ పంటను 70 ఏళ్లుగా కర్ణాటక కేరళ, తమిళనాడు, సిక్కిం, మహారాష్ట్రలో చేస్తున్నప్పటికీ, ప్రస్తుతం ఉన్న మార్కెట్ డిమాండ్ వలన రైతులు, వ్యాపారులు అమితంగా ఆసక్తి చూపుతున్నారు. అందువలన ఇప్పుడు ఈ పంటను వాణిజ్యపరంగా ఆంధ్ర తెలంగాణ సహా దేశంలో అన్ని రాష్ట్రాల్లోనూ ఎక్కువగా సాగు చేయుటకు ముగ్గు చూపుతున్నారు.
ఈ పంట ఉష్ణ మండలం (లేదా) తేమ ఎక్కువగా ఉండే ఉప-ఉష్ణ మండల ప్రాంతాలు అనుకూలం. ఉష్ణోగ్రతలు 20-35° సె, వర్షపాతం 800-1500 ఎం.ఎం ఉన్న ప్రాంతాలు అనుకూలం. నల్లరేగడ భూములు సాగుకు పనికిరావు. ఉదజని సూచిక 5.5-6.5 ఉండి, నీటిపారుదల వ్యవస్థ బాగా ఉన్న నేలలు మిక్కిలి అనుకూలం.
విత్తనం ద్వారా ప్రవర్తనం చేసిన మొక్కలైతే 5-6 సం, అంటూ మొక్కలు అయితే 3-4 సం.లో దిగుబడి వస్తాయి. కానీ అవకాడో పంట సాగు చేస్తున్న రైతు సోదరులు వచ్చిన పూత రాలిపోతుందని, కాయలు రావటం లేదని ఇలా ఇతర సమస్యలతో దిగబడి పొందటం లేదు దీనికి గల కారణాలు చూసినట్లయితే, మన వాతావరణానికి అనుకూలమైన రకాలను ఎంచుకోకపోవడం, అలాగే టైప్-ఎ మరియు టైప్-బి రకాలు (10:1) నిష్పత్తిలో ఉండకపోవడం (సరైన అవగాహన లేక).
అవకాడో సాగులో అధిక దిగుబడులను పొందాలంటే ముందుగా మన వాతావరణానికి అనుకూలమైన రకాలను ఎంచుకోవాలి. ఈ పంటలు పువ్వు యొక్క ప్రవర్తన బట్టి రెండు విధాలుగా విభజించబడింది. టైప్-ఎ మరియు టైప్-బి
పూర్తి వివరాల్లోకి వెళ్ళినట్లయితే ఈ పంటలో వచ్చే పువ్వు గుచ్చిలను “కాంపౌండ్ పానికిల్” అని అంటారు. ఇందులో ద్వీలింగ పుష్పాలు ఉంటాయి. కానీ ఈ పుష్పాలు “ప్రోటోగైనస్ డైకోగామి” అనే స్వభావాన్ని కలిగి ఉంటాయి. దీనివలన ఆడ, మగపూలు వేరు వేరు సమయాల్లో లైంగిక గ్రహణా శక్తిని కలిగి ఉంటాయి. దాని వలన స్వీయ పరాగ సంపర్కం (self-pollination) జరగదు. ఈ స్వభావాన్ని బట్టి టైప్-ఎ, టైప్-బి గా విభజించడం జరిగింది.
టైప్-ఎ మరియు టైప్-బి రకాలలో పుష్పించే విధానం
ఈ పంటలో ఆడ, మగపూలు ఒకేసారి దొరుచుకున్నట్లయితేనే పరాగసంపర్కం జరిగి ఫలాధికారణ చెందడం జరుగుతుంది. ముఖ్యంగా తేనె తీగలు (ఎపిస్ సెరెనా) మరియు పురుగులు రాగ సంపర్కానికి దోహదపడతాయి. కనుక రైతులు మంచి దిగుబడులు పొందాలంటే టైప్-ఎ మరియు టైప్-బి రకాలు (10:1) నిష్పత్తిలో తోటలో నాటుకోవాలి.
అలాగే సరైన సమయాల్లో చెట్టుకు పోషకాలు అందించాలి. 5 సం పైబడిన చెట్టుకు 50 కేజీల పశువుల ఎరువు, యూరియా 700 గ్రా, డి.ఎ.పి 400 గ్రా, పోటాష్ 850 గ్రా లను రెండు దఫాలుగా ‘మే-జూన్’ మరియు ‘అక్టోబర్-నవంబరు’ మాసాలలో వేసుకోవాలి. నీటి తడులను కూడా అవసరాన్ని బట్టి అందించాలి. పంటను ఆశించే చీడపీడలను ముఖ్యంగా పిండి పురుగు ఆంత్రాక్నోస్ వంటి యాజమాన్య పద్ధతులను పాటించాలి.
టైప్-ఎ రకాలు :-
- అర్కా సుప్రీమ్ (ఐ.సి. ఎ.ఆర్ – ఐ.ఐ.హెచ్.ఆర్, బెంగళూరు)
కాయ బరువు – 370-420 గ్రా
గుచ్చు శాతం – 60-70%
కొవ్వు శాతం – 18-20%
- లాంఛ్ హస్
- పింకర్ టన్
- హస్
టైప్-బి రకాలు :-
- అర్కా రవి (ఐ.సి. ఎ.ఆర్ – ఐ.ఐ.హెచ్.ఆర్, బెంగళూరు)
కాయ బరువు – 450-600 గ్రా
గుచ్చు శాతం – 80%
కొవ్వు శాతం – 12-14%
- ఫ్యూరెట్
- ఎట్టింగర్
- షెపర్డ్
కనుక రైతు సోదరులు అవకాడో పంట సాగులో మన వాతావరణానికి అనుకూలమైన రకాలను ఎన్నుకోవాలి, అందులో టైప్-ఎ మరియు టైప్-బి రకాలు ఉండేలా జాగ్రత్త పడాలి, సమయానుసారం తగిన యాజమాన్య చర్యలు చేపట్టినట్లయితే అధిక దిగుబడులను సాధించగలరు.
డా.సి. భానుమూర్తి, డా.జి. తనుజ శివరామ్, డా.ఎం. కవిత, డా.ఎల్. రంజిత్ కుమార్, డా.డి. శ్రీనివాస్ రెడ్డి, డా.సి.హెచ్. రూత్ మరియు వి.గోపి ప్రాంతీయ ఉద్యాన పరిశోధనా స్థానం, తిరుపతి,డా. వై.యస్.ఆర్ ఉద్యాన విశ్వవిద్యాలయం, వెంకట రామన్న గూడెం ఫోన్:- 9014269571
