రైతులు కోళ్ల పెంపకంలో వేల ఆదాయం పొందవచ్చు..

గ్రామంలో నిరంతర ఆదాయం పొందే మార్గాలు చూపగలిగితే పొట్ట చేతపట్టుకొని పట్టణాలకు వలస వెళ్లే దుస్థితి ఉండదు. గ్రామంలోనే ఉంటూ రోజువారీ కొద్ది పాటి శ్రమతో, కొద్దిపాటి పెట్టుబడితో నిరంతరం ఆదాయం పొందే మార్గాన్ని సూచిస్తున్నారు యువ పశువైద్యుడు డా.ఆవుల సాయి మహేష్ రెడ్డి. యువతకే కాదు వృద్ధులకూ ఉపయోగపడేలా సులభమైన రీతిలో చేయగలిగే మంచి ఉపాయం ఆలోచించారు. పెరట్లోనే గుడ్లు పెట్టే కోళ్ల పెంపకానికి ఉపయోగపడే చిన్నపాటి పంజరాన్ని రూపొందించారు. ఇప్పటికే 80 మంది ఈ యూనిట్లను ఏర్పాటు చేసుకొని నెలకు రూ. పది వేల నికరాదాయాన్ని పొందుతుండటం విశేషం. గుంటూరు జిల్లా నెకరికల్లు మండలం నర్సింగపాడు గ్రామానికి చెందిన ఆవుల సాయి మహేష్ రెడ్డిది వ్యవసాయ కుటుంబం. కృష్ణా జిల్లా గన్నవరం కళాశాలలో పశువైద్యంలో గ్రాడ్యుయేషన్ పూర్తి వేశాడు. 2017 లో ఈపూరు ,మండలం ముపాళ్ళలో పశువైద్యునిగా ఉద్యోగంలో చేరారు. గేదెలను పోషిస్తూ పొట్ట పోసుకునే రైతు కుటుంబాలు గిట్టుబాటు కాని పరిస్థితుల్లో గేదెలను అమ్మివేసి పట్టణాలకు పొట్ట చేతపట్టుకొని వలస పోతున్న సందర్భాలలో ఈ సమస్యకు ఏదైనా పరిష్కారం చూపితే మేలు జరుగుతుందని భావించిన మహేష్ రెడ్డి గుడ్లు పెట్టే 120 కోళ్లను పెరట్లో సునాయాసంగా పెంచుకోవడానికి వీలయ్యే “త్రీ టైర్ కేజ్ సిస్టమ్” ను రూపొందించారు. మొదటిగా తమ పెరట్లోనే ఏర్పాటు చేశారు. వయోవృద్దుడైన తన తండ్రే దీన్ని చక్కగా నిర్వహిస్తున్నారు. ముప్పాళ్ల మండలంలోనే కాదు అనేక జిల్లాల్లో 80 మంది వరకూ ఈ కేజ్ ని ఏర్పాటు చేసుకొని చక్కని ఆదాయం పొందుతున్నారని మహేష్ రెడ్డి తెలిపారు.
కొట్టంలో లేదా షెడ్ లో పాడి గేదెను కట్టెయ్యడానికి 8 అడుగులు వెడల్పు, 8 అడుగుల పొడవున స్థలం అవసరమవుతుంది. గేదెలను అమ్మేసుకున్నప్పుడు ఆ షెడ్ ఖాళీగానే ఉంటుంది. ఆ చోటులో పెట్టుకోదగిన విధంగా తాను గుడ్లు పెట్టె కోళ్లను పెంచుకునే మూడు అంతస్థుల పంజరానికి మహేష్ రెడ్డి రూపకల్పన చేశారు. దీని పొడవు 7.5 అడుగులు, వెడల్పు 7 అడుగులు, ఎత్తు 7 అడుగులు ఉంటుంది. ఒక వైపు 3 కానాలు, రెండో వైపు మరో 3 కానాలను కోళ్ల కోసం ఏర్పాటు చేశారు. రోజూ దీన్ని నింపితే చాలు. ఆ నీరు కోళ్లకు అందుబాటులోకి వస్తాయి. 18 -19 వారాల వయసులో కోడి గుడ్లు పెట్టటం ప్రారంభిస్తుంది. ఆ వయసులో ఉన్న 120 కోళ్లను పెంచుకోవటం ప్రారంభిస్తే సుమారు సంవత్సర కాలం పాటు అవి గుడ్లు పెడతాయి. ఆ కోళ్లను అమ్మేసి.. మళ్ళీ గుడ్లు పెట్టే వయసున్న కోడి పెట్టలను కొనుక్కొని పంజరంలో పెంచుకోవచ్చు. తెల్లని లేదా గోధుమ రంగులో పెట్టలను పెంచుకోవచ్చు. తెల్ల కోళ్లయితే ఉత్పత్తి 95% వరకు ఉంటుంది. గోధుమ రంగులో కోళ్లయితే గుడ్ల ఉత్పత్తి 83% మేరకు ఉంటుందని మహేష్ రెడ్డి వివరించారు. 120 కోళ్ళలో రోజుకు కనీసం 110 గుడ్ల ఉత్పత్తి జరుగుతుంది.
కోళ్లను పంజరంలో ఉంచే పెంచాలి. బయటకు వదిలే అవసరం లేదు. తెల్లవారుజామున 4.30 – 5 గంటల మధ్యలో లైటు వేయాలి. అప్పుడు 4.5 కిలోల దాణాను 120 కోళ్లకు వేయాలి. పంజరం పైన 6 అడుగుల ఎత్తులో అమర్చిన చిన్న ట్యాంక్ లో 20 లీటర్ల నీరు పోయాలి. కోళ్లు ,ముక్కుతో పొడిస్తే నీరు అందుబాటులోకి వచ్చి వాటి దాహం తీర్చే ఏర్పాటు ఈ పంజరంలో ఉంది. సాయంత్రం 5 గంటల ప్రాంతంలో మరో 4.5 కిలోల దాణాను వేయాలి. రాత్రి 8.30 గంటలకు లైట్లు తీసివేయాలి. అంతే నేలకు కొంత ఎత్తున కోళ్లు పంజరంలో ఉంటాయి. కాబట్టి పాములు, కుక్కల బెడద ఉండదు. ఒక్క మాటలో చెప్పాలంటే చిన్నపాటి కోళ్ల ఫారాన్ని నిర్వహించడం పెద్ద కష్టం ఏమీ ఉండదు. గుడ్లను ఇంటి దగ్గరే స్వయంగా అమ్ముకోవచ్చు. ఇటువంటి పంజరాలు ఒక్కరే నాలుగైదు ఏర్పాటు చేసుకోవచ్చు కూడా. ఈ విధంగా చిన్నపాటి యూనిట్లు స్థాపించే యువకులు, రైతులకు ప్రభుత్వం నుండి ప్రోత్సహం లభిస్తుందని డా. మహేష్ రెడ్డి తెలిపారు. తన దగ్గరకు వచ్చిన యువతకు ఇలాంటి పథకాల గురించి వివరిస్తున్నారు. ప్రస్తుతం ఈపూరు మండలంలోని ముప్పాళ్ల గ్రామంతోపాటు ప్రకాశం, గుంటూరు జిల్లాలో 80 వరకు యూనిట్లు ఇప్పటికే విజయవంతంగా నడుస్తుండటం విశేషం.

గుడ్లు పెట్టే వయసున్న 120 కోళ్లతో పాటు మూడు అంతస్థుల కేజ్ సిస్టమ్ ను కొనుగోలు చేయాలంటే రూ. 45,000 వరకు ఖర్చవుతుంది. ఇనుప మెష్ తో కోళ్ల బుట్టలను అల్లే వారు గ్రామాల్లో అక్కడక్కడా ఉంటారు వాళ్ళయినా ఈ పంజరాన్ని తయారు చేయగలుగుతారు. అలా చేయించుకుంటే రూ. 30 – 35 వేలలోనే పూర్తవుతుంది. ఒక గేదెకు సరిపోయే స్థలం ఈ పంజరానికి సరిపోతుంది. రోజుకు కోడికి 80 గ్రాముల దాణా అవసరం. 120 కోళ్ల పెంపకం ద్వారా రోజూ 110 గుడ్ల ఉత్పత్తి ఏడాది వరకు పొందవచ్చు. ఇంటి దగ్గరే గుడ్డు రూ. 5 చొప్పున అమ్ముకోవచ్చు. దాణా ఇతరత్రా ఖర్చులు పోను ఒక్కో పంజరం నుంచి రూ. పది వేల నికరాదాయం వస్తుంది.