జామ ఆకుల టీ – ఆరోగ్య ప్రయోజనాలు

చాలా మందికి జామ ఆకులతో టీ పెట్టుకోవచ్చని తెలియదు. ఈ టీ చేయడం చాలా తేలిక. ఎంతో ఆరోగ్యకరం. మరి ఎలా ప్రిపేర్ చెయ్యాలో తెలుసుకుందాం..
జామ ఆకుల సీక్రెట్ తెలిసిన కొంత మంది దశాబ్దాలుగా వాటితో టీ పెట్టుకొని తాగారు. కాలక్రమంలో రకరకాల కొత్త టీలు వచ్చాక ఈ టీ కనుమరుగైంది. ఇప్పుడు మళ్ళీ తెరపైకి వచ్చింది. జామ ఆకుల టీ పొడిని గ్వావా గ్రీన్ టీ అని కూడా పిలుస్తున్నారు.
మీకు సొంతంగా టీ పెట్టుకొని తాగడం ఇష్టమైతే మీరు ఈ టీని టెస్ట్ చూడవచ్చు. జామ ఆకుల టీ అద్భుతంగా ఉండదు కానీ బాగానే ఉంటుంది. జామకాయల చెట్టు ఇంటి పెరట్లో ఉంటే దానికి ఉన్న ఆకులతోనే ఈ టీ చేసుకోవచ్చు.
కావాల్సిన పదార్థాలు:
10 జామ ఆకులు, ఏదైనా టీ పొడి – పావు టీ స్పూన్, గ్లాస్ వాటర్, తేనె లేదా బెల్లం.
తయారీ విధానం:
ముందుగా 10 జామ ఆకులను శుభ్రంగా కడగండి. ఇప్పుడు టీ పాత్రలో నీరు పోసి ఉడకనివ్వండి. నీరు బుడగలు వస్తున్నప్పుడు జామ ఆకులు వెయ్యండి. ఆకులను ముక్కలు చేసి వేస్తే మంచిది. 5 నిముషాలు ఉడకనివ్వండి. నీరు రంగు, రుచికరమైన వాసన వచ్చే వరకూ ఉడకనివ్వండి. ఇప్పుడు ఇంకొంచెం నీరు పోసి 10 నిముషాలు ఉడకనివ్వండి. ఆ తర్వాత వడగట్టి ఒకటిన్నర టీ స్పూన్ తేనె లేదా బెల్లం వేసి కలిపి తాగండి.
జామ ఆకుల టీ ప్రయోజనాలు:
ఈ టీ లో రోగాలను నియంత్రించే గుణాలు ఉన్నాయి. అలాగే శరీరానికి చలవ చేసి వేడిని తగ్గిస్తుంది. మరో గుణం ఏంటంటే.. జామ ఆకులు చెడు కొలెస్ట్రాల్ ని తగ్గించగలవని న్యూట్రిషన్ అండ్ మెటబాలిజం అనే జర్నల్ లో తెలిపారు. ఐతే ఈ టీ ని వరుసగా 8 వారాలపాటూ రోజూ తాగాలి. అప్పుడే బరువు తగ్గుతారు. అలాగే గుండెకు ఎంతో మేలు జరుగుతుంది.