సుసిద్ధమైన నారుమడి – విజయవంతమైన యాసంగి వరి

యాసంగి వరిలో తెలంగాణలోని ఎక్కువ జిల్లాలలో (ముఖ్యంగా నిజామాబాద్, అదిలాబాద్, జగిత్యాల్)  చలి తీవ్రత ఎక్కువగా ఉంటుంది. ముఖ్యంగా పంట యొక్క శాఖీయ దశ అనగా నారుమడి మరియు పిలకలు వేయు దశలలో చలి తీవ్రత అధికంగా ఉంటుంది. సాధారణంగా వరి మొలకెత్తటానికి 25-45 డిగ్రీల సెల్సియస్, మొక్కల ఎదుగుదలకు25-35 డిగ్రీల సెల్సియస్ మధ్య ఉష్ణోగ్రతలు ఉండటం చాలా మంచిది. అయితే మన రాష్ట్రంలో కొన్ని జిల్లాలలో చలి తీవ్రత వల్ల ఉష్ణోగ్రతలు ఒక్కొక్కసారి10-15 డిగ్రీల సెల్సియస్ వరకు తగ్గుతాయి.10-12 డిగ్రీల సెల్సియస్ మధ్య రాత్రి ఉష్ణోగ్రత ఉన్నట్లయితే చలి తీవ్రత వల్ల పంట యొక్క శాఖియా వరి నారు ఎర్రబడడం, ఎదుగుదల తగ్గిపోవడం, పంట కాలం పెరిగిపోవడం తద్వారా దిగుబడులు తగ్గడం సాధారణంగా గమనిస్తుంటాము.

రైతులు ఈ సమస్యను అధిగమించడానికి యాసంగి సీజన్ కు అనుగుణంగా కొన్ని జాగ్రత్తలు పాటించినట్లయితే ఆరోగ్యవంతమైన నారును పెంచుకోవచ్చు.

విత్తన శుద్ధి:- చలికాలంలో అధికంగా ఆశించే అగ్గి తెగులుతో పాటు విత్తనం ద్వారా వ్యాపించే ఇతర తెగుళ్ళ ను  అరికట్టడానికి 1 కిలో విత్తనానికి 3 గ్రాముల కార్బండ జిమ్ కలిపి24 గంటల తరువాత నారుమడిలో చల్లుకోవాలి. దంపనారు మెళ్ళకైతే లీటరు నీటిలో 1 గ్రామ్ కార్బండ జిమ్ కలిపి 1కిలో విత్తనాన్ని24 గంటలు నానబెట్టి తర్వాత మండే కట్టి నారుమడిలో చల్లుకోవాలి.

విత్తే సమయం:- రబీలో వేసుకునే రకాల కాలపరిమితి బట్టి నారుమళ్ళలో నవంబరు 15 నుండి డిసెంబరు చివరి వరకు విత్తుకోని చలి నుండి పైరును కాపాడాలి. అధిక దిగుబడులు సాధించాలంటే చలిని తట్టుకొనే అనువైన రకాలను ఎంపిక చేసుకోవడంతో పాటు విత్తనాలు విత్తుకునే సమయం తెలుసుకోవడం చాలా ముఖ్యమైనది.

• మధ్యకాలిక రకాలు (135-140) రోజులు : నవంబరు నుండి డిసెంబరు రెండవ వారం వరకు
• స్వల్పకాలిక రకాలు(120-125): నవంబరు15 నుండి డిసెంబరు చివరి వరకు

ఏ రకమైన పొట్ట దశ నుండి పూత దశ పూర్తయ్యే వరకు చలి వాతావరణం అనగా ఉష్ణోగ్రత10-15 డిగ్రీల కన్న తక్కువ ఉంటే గింజ పట్టక (నిండుకోక ) తాలు గింజలు ఏర్పడి దిగుబడి తగ్గుతుంది. కాబట్టి సాగు చేసిన వరి రకము యొక్క పూత దశ చలి పూర్తయిన తరువాత వచ్చే విధంగా చూసుకొని నారు పోసుకొని నాట్లు వేసుకోవాలి. యాసంగి సీజనులో స్వల్ప కాలిక రకాలను అక్టోబరు చివరి వారంలో లేదా నవంబరు మొదటి వారంలో నారు పోసి నాటుకున్నట్లయితే ఆ పంట చిరు పొట్ట దశ నుండి కంకి ఈనే దశలో చలి వాతావరణం ఉండి, కంకి పూర్తిగా పోటాకు నుండి బయటకు రాకపోవడం, గింజలు పట్టక తాలు పోవడం జరిగి దిగుబడి తగ్గుతుంది. కాబట్టి నీటి వసతిని బట్టి స్వల్ప కాలిక రకాలను నవంబరు 10 వ  తేదీ నుండి డిసెంబరు చివరి వరకు నార్లు పోసుకోవాలి.

యాజమాన్యం:-

• నారును ఎత్తయిన మడులలో పోసుకోవాలి. ఒక ఎకరాకు సరిపోయే 2 గుంటల నారు మడికి 2 క్వింటాళ్ళ కోళ్ళ ఎరువు లేదా గొర్రెల ఎరువు లేదా వర్మీ కంపోస్ట్ వేసి కలియ దున్నుకోవాలి.
• నారు మడి 2 గంటలకు 2 కిలోల నత్రజని (1 కిలో విత్తనం చల్లే ముందు మరియు కిలో విత్తన 12-14 రోజులకు), 1 కిలో భాస్వరం, 1 కిలో పొటాష్ ఎరువులను దుక్కి లో వేయాలి. చలి ఎక్కువగా ఉండే ఉత్తర తెలంగాణలోని ప్రాంతాల్లో భాస్వరం మోతాదును రెట్టింపు వేయాలి .
• నారుమడిలో ఊద గడ్డి నిర్మూలనకు బ్యూటాక్లోర్ 7.5 మిల్లీలీటరు నీటిలో కలిపి విత్తన 7 లేక 8 రోజుల నారుమడిలో నీటిని తీసివేసి పిచికారి చేయాలి. సైహాలో పాప్ బ్యూటైల్ 2 మీ . లి లీటర్ లేదా బిస్ పైరిబాక్ సోడియం 0.6 మీ . లి లీటరు నీటిలో కలిపి విత్తన 14 లేదా15 రోజులకు పిచికారి చేయాలి.

చలి నుండి నారుమడి రక్షణకు కొన్ని సూచనలు:-

• చలి తీవ్రత ఎక్కువగా ఉన్నప్పుడు నారు మడి పై టార్పా లీన్ , పాలిథిన్ షీట్ లేదా మరియు సంచులతో కుట్టిన పట్టాలను రాత్రి వేళల్లో కప్పి ఉంచినట్లయితే చలి ప్రభావం తక్కువగా ఉండి నారు త్వరగా పెరుగుతుంది.
• చలికి నారు దెబ్బతినకుండా నారు మడికి సాయంత్రం నీటిని ఎక్కువగా పెట్టి మరుసటి రోజు ఉదయాన్నే చల్లటి నీటిని తీసివేసి మరల కొత్తనీరు పెడుతూ ఉండాలి.
• చలి తీవ్రత ఎక్కువగా ఉండే ప్రాంతాల్లో మరియు అగ్గి తెగులును తట్టుకునే రకాలను ఎంచుకోవాలి.
• అధిక చలి కారణంగా జింక్ లోప లక్షణాలు కనిపించినట్లయితే లీటరు నీటికి
  2 గ్రాముల జింక్ సల్ఫేట్ కలిపి నారుమడిలో పిచికారి చేయాలి.

పైన సూచించిన యాజమాన్య పద్ధతులను పాటించి సరియైన సమయంలో నారు పోసుకొని నారు యాజమాన్యం సక్రమంగా చేసుకుంటే రైతులు రబి వరి సాగులో అధిక దిగుబడులు సాధించవచ్చు.

డా. రమ్యా రాథోడ్, ఎం. సాయి చరణ్, డా. కృష్ణ చైతన్య, డా. వై.ఎస్. పరమేశ్వరి, డా. ఆర్. రమేష్, జి. రాకేష్, మంజు భార్గవి మరియు డా. కె. పవన్ చంద్ర రెడ్డి, ప్రాంతీయ చెఱకు మరియు వరి పరిశోధన స్థానం, రుద్రూర్, నిజామాబాద్