Mango Cultivation: మామిడి తోటల్లో ప్రస్తుతం తీసుకోవలసిన జాగ్రత్తలు

టెంక పురుగులు: ఈ పురుగులు కాయలు చిన్నగా ఉన్నప్పుడే గుడ్లు పెట్టడం జరుగుతుంది. తరువాత కాయలోకి చొచ్చుకుపోయి టెంకలోకి ప్రవేశిస్తాయి. ఈ రంధ్రం మూసుకుపోయి లోపల పురుగు అభివృద్ధి చెందుతుంది. ఆలస్యంగా కోతకు వచ్చే రకాలలో వీటి బెడద ఎక్కువగా ఉంటుంది. దీని నివారణకు కార్బరిల్‌ 3 గ్రాములు మందు ఒక లీటరు నీటిలో కలిపి  పిందె పుట్టిన తరువాత ఒకసారి, నెల తరువాత మరో సారి పిచికారీ చేయాలి. ఇందువల్ల గుడ్లు వాటి నుండి వచ్చే పిల్లలు చనిపోతాయి. టెంకలో  పురుగు దూరిన తర్వాత  మందు ప్రయోజనం ఉండదు. రాలిన కాయలను ఏరి నాశనం చేయాలి.

పండు ఈగ: కాయలు పక్వానికి రాగానే  పండు ఈగ ఉధృతి ఎక్కువ లార్వాలు కాయలోని మెత్తని కండను తినడం వలన కాయ మెత్తబడి కుళ్ళి రాలిపోతుంది. దీని నివారణకు రాలిపోయిన పండ్లను ఏరి నాశనం చేయాలి. చెట్టు కింద  దున్ని కోశస్థ దశను బయటకు తీసి వేయాలి. కార్బరిల్‌  10 శాతం పొడిని భూమిలో (50 నుండి 100 గ్రాములు / చెట్టుకి కలుపుట). మిథైల్‌యూజినాల్‌ ఒక ప్లాస్టిక్‌ పళ్లెంలో రెండు మిల్లీ లీటర్లు మరియు మూడు గ్రాములు కార్భోఫ్యూరాన్‌ 3 గ్రాములు లీటరు నీటిలో కలిపి తోటలో అక్కడ అక్కడ ఉంచాలి. మలాథియాన్‌ రెండు మిల్లీ లీటర్లు లీటరు నీటిలో కలిపి 15 రోజుల వ్యవధిలో రెండుసార్లు పిచికారీ చేయాలి.

కాయతొలుచు పురుగు: మామిడి పిందెలు గోళీ సైజులో ఉన్నప్పుడు గొంగళి పురుగులు ఆశించి పిందె రాలిపోతుంది. దీని నివారణకు డైక్లోరోవాస్‌ 1.5 మిల్లీలీటర్లు లేదా క్లోరిపైరిఫాస్‌ 2.5 మిల్లీ మీటర్లు లేదా వేప నూనె మూడు మిల్లీ లీటర్లు క్లోరిపైరిఫాస్‌ ఒక మిల్లీ లీటరు లీటరు నీటికి కలిపి పిచికారీ చేయాలి.

మసి మంగు: ఈ తెగులు కాప్నోడియం అనే శిలీంద్రం ద్వారా వస్తుంది. రసం పీల్చే పురుగులు విసర్జించిన పదార్థంపై ఆకుల మీద పిందెలు మరియు కాయల మీద నల్లటి మంగు పెరుగుతుంది. దీనివల్ల కాయ సైజు తగ్గిపోయి రాలిపోతాయి.

దీని నివారణకు రసం పీల్చే పురుగు ను సమర్ధవంతంగా అరికట్టాలి. మూడు గ్రాముల కాపర్‌ ఆక్సీక్లోరైడ్‌ చెట్లపైన పిచికారీ చేయాలి. ఆకులపైన మసిని తొలగించుటకు రెండు కిలోల గంజి పొడిని గోరువెచ్చని నీటిలో కలిపి మూడు నుండి నాలుగు లీటర్ల తెగుళ్లు కనిపించిన భాగాన పిచికారీ చేయాలి. నాలుగు నుండి ఐదు రోజుల తరువాత నీటిని పిచికారీ చేసి ఈ సమస్యను తొలగించవచ్చు.

మచ్చ తెగులు: ఈ తెగుళ్లు ఆశించినప్పుడు గోధుమరంగు మచ్చలు, ఆకులు, పండ్లు, పూల మీద కనపడతాయి. తెగులు ఉధృతంగా ఉంటే పూరెమ్మలు, పిందెలు రాలిపోతాయి. కాపు బాగా తగ్గుతుంది.  మరియు పండ్లు కుళ్ళిపోతాయి.

దీని నివారణకు ఎండుకొమ్మలు తీసివేసి లీటరు నీటికి మూడు గ్రాముల కాపర్‌ ఆక్సీక్లోరైడ్‌ కలిపి పిచికారీ చేయాలి. లేదా ఒక గ్రాము కార్బండిజమ్‌ లీటరు నీటికి కలిపి 15 రోజుల వ్యవధిలో రెండుసార్లు పిచికారీ చేయాలి.

Also Read: భారతదేశంలో పౌల్ట్రీ రంగంపై కోవిడ్‌-19 – లాక్డౌన్‌ ప్రభావం