Korameenu Fish Farming: వ్యాపార సరళిలో కొర్రమీను చేపల పెంపకం చేపట్టవలసిన యాజమాన్య పద్ధతులు

ఈ సైజు చేపలకు మార్కెట్లో మంచి గిరాకీ ఉంటుంది. నల్లరేగడి భూములు అనువైనవి. సంవత్సరంలో పొడవునా నీరు అందుబాటులో ఉండాలి. దీర్ఘచతురస్రాకారంగా నిర్మించిన చెరువు పెంపకానికి అనువుగా ఉంటుంది. వైశాల్యం 0.05-0.1 హెక్టార్లు లేదా 0.1-0.2 హెక్టార్లు వరకు ఉండవచ్చు. హెక్టారు విస్తీర్ణంలో 300 కిలోల సున్నాన్ని వాడాలి. చెరువులో 20-30 శాతం కలుపు మొక్కలు ఉండేటట్లు చూడాలి. నీటిలోతు 2-5 అడుగులుంటే మంచిది. దీనివల్ల గాలి కోసం నీటి పైభాగానికి రావడానికి చేపలకు శ్రమ ఉండదు.

సహజ వనరుల నుంచి సేకరించిన చేప పిల్లలను, పెంపకానికి చేపట్టే స్టాకింగ్‌ చెరువుకు రవాణా చేయాలి. ఇనుప డ్రమ్ములలో గాని, ప్లాస్టిక్‌ డబ్బాలు, కుండలు లేదా బిందెలలో రవాణా చేయవచ్చు. అయితే వీటిలో చేప పిల్లలు గాలిని పీల్చేందుకు సరిపడా స్థలం ఉండాలి. ఈ పాత్రలలో వాలిస్‌ నేరియా, హైడ్రిల్లా వంటి నీటి మొక్కలను వేస్తే చేప పిల్లలు రవాణా సమయంలో ఎగరకుండా ఉంటాయి.

ఫింగరింగ్‌ దశలో ఒకే సైజు ఉన్న చేప పిల్లలను చెరువులోకి వదలటం వల్ల స్వజాతి భక్షణ ఉండదు. ఫింగర్‌ లిండ్లను నీటిలోకి వదిలే ముందు వాటిని 2 శాతం పొటాషియం పర్మాంగనేటు కలిపిన ద్రావణంలో 2 నిమిషాలు ఉంచాలి. తరువాత 2 శాతం ఉప్పు కలిపిన ద్రావణంలో మరో 2 నిమిషాలు ఉంచాలి. ఇలా చేయడం వల్ల వాటిపై ఉండే సూక్ష్మక్రిములు నశిస్తాయి.

చేప పిల్లలను ఆగస్టు- అక్టోబరు మాసం వరకు చెరువులో స్టాక్‌ చేసుకోవచ్చు. మోనోకల్చర్‌ పెంపకంలో ఒక హెక్టారుకు 30,000 నుండి 40,000 పిల్లలను వేయవచ్చు. వీటితో పాటు గడ్డి చేపలు, బొచ్చెలు హెక్టారుకు 2,000 చొప్పున వేస్తే, చెరువులో కలుపు మొక్కలను నివారించవచ్చు. బొమ్మె చేప పిల్లల కంటే బొచ్చె, గడ్డి చేప పిల్లల సైజు పెద్దవిగా ఉండాలి.

ఫింగర్‌ లింగ్‌ దశ పిల్లలను చెరువులోకి వదలిన తరువాత ఆహార యాజమాన్యం చాలా కీలకం. ఇవి ప్రధానంగా మాంసాహార చేపలు. చేప పిల్లలు వేసిన తరువాత మొదటి రెండు నెలలు రోజుకు మూడుసార్లు, 3-5 నెలల మధ్య రోజుకు రెండుసార్లు, 6-9 నెలలవరకు రోజుకు ఒకసారి అనుబంధ ఆహారం ఇవ్వాలి.

ఎండు చేపలు, తౌడు (50G50 శాతం) కలిపి ఇచ్చేటప్పుడు, ముందుగా ఎండు చేపలను పొడిచేసి ఉడక పెట్టాలి. దీనికి తౌడు కలిపి తిరిగి బాగా ఉడక పెట్టాలి. ఆ మిశ్రమాన్ని ఉండలు చేసి ఫీడ్‌ ట్రేలో వేసి పెట్టాలి. మామూలుగా ఇచ్చే దాణా తయారీకి కావలసిన ముడి సరుకులు మార్కెట్లో కావాలనుకున్నప్పుడు దొరకవు. ధర కూడా సీజన్‌ బట్టి మారుతూ ఉంటుంది. ధర తక్కువ ఉన్నప్పుడు కొని నిల్వ ఉంచుకోవడం కూడా కుదరదు.

దీనికి ప్రత్యామ్నాయం గుళికల దాణా ఇవ్వడం. చేపల పెరుగుదలకు కావలసిన ప్రొటీన్లు, కార్బోహైడ్రేటులు, కొవ్వులు, విటమిన్లు వంటివన్నీ కలిపి తయారు చేసిన గుళికలు ఇవి. ఈ రకమైన దాణా అన్ని వేళలా అందుబాటులో ఉంటుంది. ఒక ప్రాంతం నుండి వేరే ప్రాంతానికి రవాణా సులభం. ఎక్కువ కాలం నిల్వ ఉంచుకోవచ్చు. నీటిలో కరిగిపోకుండా ఎక్కువ కాలం ఉంటుంది. ఫీడిరగ్‌ను కంట్రోలు చేయవచ్చు. నీటి నాణ్యతను కాపాడుకోవడంతో పాటు చెరువును కాలుష్యం నుండి రక్షించుకోవచ్చు. చెరువులో విద్యుద్దీపాలు అమర్చినప్పుడు దీపపు పురుగులు ఆకర్షింపబడతాయి. ఇలా నీటిలో పడిన పురుగులను బొమ్మె చేపలు ఇష్టంగా తింటాయి.

శీతాకాలంలో సాధారణంగా ఉష్ణోగ్రతలు చాలా తక్కువ స్థాయికి పడిపోతాయి ఈ సమయంలో రకరకాల బ్యాక్టీరియల్‌, ప్రోటోజోవన్‌ మరియు ఫంగల్‌ వ్యాధులతో పాటుగా ‘‘ఇయుఎస్‌’’ వ్యాధులు ఎక్కువ సోకుతాయి. తెలంగాణలో ఎక్కువగా ఎర్రమచ్చల వ్యాధి వ్యాప్తి చెందుతుంది. ఇది తల భాగంలో మొదలై క్రమేపీ శరీరమంతా వ్యాప్తి చెంది చేపలు చనిపోవడానికి కారణం అవుతుంది. ఎర్ర మచ్చలు వ్యాధితో పాటుగా ఫంగల్‌ వ్యాధులు కూడా ఎక్కువగా గమనించడం జరిగింది. ఇతర చేపలతో పోల్చినపుడు ఈ చేపలకు రోగనిరోధక శక్తి ఎక్కువ.

సహజ వనరుల నుండి పిల్ల చేపలను సేకరించడం వల్ల వాటికి వ్యాధులను తట్టుకునే శక్తి ఎక్కువగా ఉంటుంది, అయితే ఆయా కారణాల వల్ల, ఒత్తిడికి గురైనప్పుడు అవి బలహీనపడతాయి. నివారణ చర్యలుగా, ప్రతి 3-4 నెలలకు ఒకసారి నీటిని మారిస్తే సరిపోతుంది. రోజు వాడే దాణా వల్ల చెరువు అడుగు భాగం కాలుష్యానికి గురయ్యే అవకాశం ఉంది. దీనికి గాను జియోలైట్‌ (20 శాతం), అయోడిన్‌ వంటి మందులు వాడాలి. దాణాతో పాటు యాంటిబయాటిక్‌ మందులు కలిపి ఇస్తే వ్యాధులను చాలావరకు అదుపు చేయవచ్చు.

చేప పిల్లలను చెరువులో వేసిన 7-8 నెలల్లో కొర్రెమీను చేపలను పట్టుకోవచ్చు. మార్కెట్‌ వివరాలు ఎప్పటికప్పుడు తెలుసుకుంటూ, ధర ఎక్కువగా ఉన్నప్పుడు పట్టితే, ఎక్కువ లాభాన్ని పొందవచ్చు. ఒక హెక్టారు నుండి 3.5-4 టన్నుల ఉత్పత్తిని సాధించవచ్చు.

Also Read: మంచినీటి చేప జాతుల ఎంపికలో మెళుకువలు