కినోవా పంట సాగు.. రైతు లాభాల బాట

ప్రస్తుతం రైతులు నూతన రకమైన పంటలను సాగు చేయడానికి ఆసక్తి చూపుతున్నారు. సంగారెడ్డి జిల్లా రాయికోడ్ మండలం శాపూర్ గ్రామంలో సాగు తక్కువ పెట్టుబడితో ఎక్కువ లాభాలను గడిస్తున్నారు. శాపూర్ గ్రామంలో ఓ రైతు 6 గుంటల పొలంలో కినోవా పంటను సాగు చేస్తున్నాడు. ఈ పంటను యాసంగిలో నీటి వసతి కింద అక్టోబర్ మొదటి 15 రోజుల నుంచి నవంబర్ మొదటి 15 రోజుల వరకు సాగు చేసుకోవచ్చు. పంట కొన్ని రకాల భూముల్లో వేసుకోవచ్చు. ఎకరానికి 6 – 8 క్వింటాళ్ల దిగుబడి వస్తున్నది. పంటలో మాంసకృత్తులు, లైసీన్, మితియోనిన్ లాంటి అమైనో ఆమ్లాలు, బీ, ఈ విటమిన్లు, సూక్ష్మ పోషకాలు, పీచుపదార్థాలు ఉంటాయి.
ఉమ్మడి మెదక్ జిల్లా రాయికోడ్ మండలంలోని శాపూర్ గ్రామంలో పంటను సాగు చేస్తున్నారు. ఈ పంటను రైతుల నుంచి నేరుగా వ్యవసాయ శాఖ అధికారులు కొనుగోలు చేస్తారు. పంటను రైతులు అనువుగా సాగుచేసుకోవచ్చు. బీపీ, షుగర్ ఉన్న వారికి ఈ పంట ఎంతో మేలు చేస్తున్నది. రాజస్థాన్, ఇతర దేశాల్లో మాత్రమే సాగు చేస్తారని రాయికోడ్ వ్యవసాయ శాఖ అధికారులు తెలిపారు. ఆసక్తి గల రైతులు తమ పొలాల్లో సాగు చేసుకోవాలని సూచించారు. ఎరువులు, విత్తనాలను రాయితీపై పంపిణీ చేస్తామన్నారు.
కినోవాలో 14 -18 శాతం మాంసకృత్తులు, లైసీన్, మితియోనిన్ అరుదైన అమైనో ఆమ్లాలు, విటమిన్లు – బీ, ఈ , సూక్ష్మ పోషకాలు, ఇనుము, కాల్షియం, మెగ్నీషియం, పీచు పదార్థాలు ఉంటాయి. కినోవా వెడల్పు లాంటి ఆకులు గల ఏకవార్షిక ఆహార పంట. ఈ పంట సుమారు 1.0 – 1.5 మీటర్ల ఎత్తు వరకు పెరుగుతుంది. వీటి విత్తనంపై పొరలో సోపోనిన్ లు ఉండటంతో చేదు రుచి, వస్తున్నది. విత్తనంపై పొరను తప్పని సరిగా తీసి వాడాలి.